BOBONARU, 26 Juñu 2026 (TATOLI) – Sarani sira iha parókia Maliana, munisípiu Bobonaru, partisipa iha misa requiem ba maktoban eis-Prezidente Repúblika, Francisco Guterres “Lú Olo”, hodi fó onra ba nia legadu no kontribuisaun boot ba luta libertasaun no dezenvolvimentu Timor-Leste.
Iha omília, padre selebrante, Alarico Casemiro Lopes, hateten katak Lú Olo nu’udar figura istórika ida ne’ebé dedika-an ba povu no nasaun durante luta no fó kontribuisaun boot ba dezenvolvimentu Estadu Timor-Leste.
Notísia relevante: Matan Ruak manifesta sentidu triste ba falesimentu eis-Xefe Estadu Francisco Guterres Lú-Olo
“Ha’u foin koñese nia hanesan Prezidente Parlamentu Nasionál, Prezidente Repúblika no Prezidente Partidu FRETILIN, maibé ita-boot sira veteranu mak hatene liután kona-ba sakrifísiu no luta ne’ebé nia halo ba nasaun ida-ne’e. Maibé, ohin ita hamutuk iha ne’e atu reza no fó onra ba saida mak saudozu halo ba rai no povu ida-ne’e”, padre selebrante hateten iha igreja pro-katedrál Maliana, ohin.
Amu-lulik ne’e mós hateten katak, durante nia mandatu nu’udar Prezidente Repúblika, entre tinan 2017 no 2022, Lú-Olo fó atensaun boot ba konsolidasaun demokrasia, respeitu ba Konstituisaun no separasaun podér sira iha Estadu.
Tuir nia, Lú Olo hatudu lideransa simples, responsavel no dedikadu atu serbí povu, la’ós atu buka interese pesoál, maibé atu promove bem komún no unidade nasionál.
“Ita haree nia dedikasaun mai husi tempu durante iha ai-laran. Depois nia sai lideransa, nia fiar metin iha nia prinsípiu hodi dedika-an tomak ba direitu autodeterminasaun, soberania no mós ba povu nia moris di’ak. Ida-ne’e ita haree Francisco Guterres Lú Olo halo no ita haree figura Lú Olo, figura lori esperansa ba ita-nia rai. Nia halo buat lubuk ida, nia nu’udar figura istorika ida”, Pe. Alarico hateten.
Bibi-Atan ne’e mós konvida jerasaun foun atu aprende husi istória no legadu Lú Olo nian, liuliu kona-ba espíritu servisu ho responsabilidade no domin ba rai ida-ne’e.
“Husi nia liafuan, asaun sira, husi ninia testemuña moris nia iha família ne’ebé simples lori daudaun mai ita konvite ida, nune’e rai iha ita-nia moris nu’udar memória ida ne’ebé nakonu ho gratidaun no esperansa no ninia sakrifisiu ho nia ezemplu sira halo ita atu moris nafatin, maski nia hadook-an husi ita-nia leet, maibé ninia prinsípiu, dedikasaun no ezemplu sira hela ho ita”, dehan.
Iha sorin seluk, membru komunidade Bobonaru, Rosalino Afonso, sente triste ho lakon ida ne’ebé boot ba Timor-Leste.
“Ita lakon ita-nia osan-mean, fundadór RDTL ida, eis-Prezidente Repúblika, eis-Prezidente Parlamentu Nasionál no Prezidente Asembleia Konstituinte, Fransisco Guterres Lú Olo. Nia luta, nia kontribuisaun no dedikasaun sei sai nafatin legadu ida ba jerasaun sira tuirmai”, Rosalino salienta.
Misa requiem ne’e ramata kontinua ho atividade kari ai-funan no sunu lilin iha Semitériu Santa Krús Maliana, hanesan sinál despedida rohan-la’ek ho eroi no lutadór no manu-alin povu Timor-Leste nia.
Notísia relevante: Falesimentu Lú-Olo, Veteranu sira iha Kovalima sente triste no lakon líder di’ak
Jornalista: Sergio da Cruz
Editora: Maria Auxiliadora
