DILI, 27 Juñu 2026 (TATOLI) – Selesaun nasionál España asegura ona fatin dahuluk iha klasifikasaun Grupu H ho pontu hitu (7) iha Kopa Mundiál FIFA 2026. Susessu ne’e mai hafoin ekipa La Roja konsege manán ho skor 1-0 hasoru Uruguai iha Estádiu Akron, Guadalajara, Méxiku, iha loron-Sábadu dadeer, oras Timor-Leste nian.
Bainhira jogu hahú, Rodri ho nia kolega sira iha liña klaran kontrola kedas ritmu jogu. Sira domina kompletamente pose de bola (ball possession) iha minutu sanolu (10) dahuluk, hodi obriga jogadór sira Uruguai nian atu dezenvolve estratéjia defensivu totál iha sira-nia área rasik.
Liña parte loos España nian, ne’ebé hatutan hosi prodíjiu foin-sa’e Lamine Yamal, sai foku prinsipál ba atake. Yamal movimenta ho agresivu tebes hodi dudu defeza adversáriu. Maske nune’e, jogadór sira Uruguai nian ne’ebé treina hosi Marcelo Bielsa hatudu esperiénsia no la pániku. Dalaruma de’it mak sira lansa kontra-atake fali iha parte karuk, hodi dudu xoke ba Mikel Oyarzabal nia pozisaun.
Molok deskansa, jogadór sira Uruguai hatudu tátika low block ka defensivu kompletamente metin. Bainhira akontese atake ruma hosi España, jogadór Uruguai na’in-neen to’o ualu bele halibur lalais iha klaran, hodi hale’u kaixa penalidade nian. Formasaun ne’e difikulta tebes pasajen españól nian hodi penetra ba guarda-redes. Mezmu España lansa sira-nia aselerasaun ho one-touch football, defeza Uruguai nafatin antisipa ho di’ak.
Iha minutu 27, Uruguai hetan oportunidade hosi kontra-atake lalais. Maibé, kruzamentu hosi Federico Valverde la nota, tanba nia kolega sira iha liña oin tarde liu atu ajuda lansa suta. Liutiha minutu tolu (30′), Uruguai kria tan oportunidade perigu seluk hosi lina kail Marcelo Bielsa nian, ne’ebé dulas defeza españól to’o konfuzaun, maske nune’e lina kotuk La Roja konseke duni sai bola hosi zona perigu.
Iha minutu ikus sira hosi primeira parte, jogadór españól sira komesa sai frustradu tanba barreira metin Uruguai nian ne’ebé hale’u jogadór na’in tolu ka haat kada dala ne’ebé sira tama iha zona perigu.
Maibé, golu ne’ebé España hein to’o ikus mai mosu duni iha minutu 42’. Utiliza pasajen kail hosi Marcos Llorente, Álex Baena ho kalma boot dulas bola ho téknika aas, hodi husik guarda-rede veteranu Fernando Muslera la iha kbiit atu salva bola referidu. Rezultadu muda ba 1-0, ne’ebé tula España lidera to’o primeira parte termina.
Transizasaun nakloke no kartaun mean iha segunda parte
Hafoin intervalu, Uruguai lakon sira-nia aprosimasaun pragmátiku. Presiza duni manán hodi mantein sira-nia oportunidade atu kualifika ba ronde 32, Uruguai muda tátika hodi hala’o jogu nakloke (open play). Oportunidade oioin hosi ekipa rua konseke kria ona.
Situasaun nakloke ne’e permite España atu movimenta ho konfortavel liu hodi uza espasu ne’ebé mamuk. Dani Olmo, ne’ebé tama troka Mikel Merino, kria kedas impaktu boot. Olmo mós hetan falta iha área penalti hafoin dulas an liu defeza, maibé árbitru la fó penalidade.
Iha minutu 86, suplente Ferran Torres eskapa hosi nia markadór no lansa suta maka’as hosi liur área penalidade nian, maibé infelizmente tiru ne’e kona trave baliza de’it.
Iha minutu 90, jogu sai manas liután. Dani Olmo halo movimentu mergulha kail hodi foti bola, maibé Agustin Canobbio halo falta todan ba nia. Tanba ne’e, Canobbio hetan kedas kartaun mean hosi árbitru hodi tenki sai hosi kampu laran.
Iha minutu lima nia rohan hosi tempu lezaun nian (injury time), laiha tan golu ruma maka marka. España asegura vitória 1-0 no hakat ho kbiit tomak ba ronde 32 hanesan vensedór Grupu H nian hamutuk ho Cabo Verde nu’udar runner-up.
Pasu segundu iha ronde 32
Iha ronde 32 (oitavu finál foun Kopa Mundiál ho formatu membru 48 nian), España nu’udar vensedór Grupu H sei hasoru segundu kampeaun (runner-up) hosi Grupu J. Fatin daruak iha Grupu J ne’e agora daudaun sei hadau malu entre Áustria no Arjélia.
Jogadór (Line-up)
Uruguai (Treinadór: Marcelo Bielsa): Fernando Muslera (GR); Guillermo Varela, Sebastián Cáceres, Mathías Olivera, Juan Manuel Sanabria; Rodrigo Bentancur, Manuel Ugarte, Federico Valverde; Agustín Canobbio, Darwin Núñez, Maximiliano Araújo.
España (Treinadór: Luis de la Fuente): Unai Simón (GR); Marcos Llorente, Pau Cubarsí, Aymeric Laporte, Marc Cucurella; Mikel Merino (Dani Olmo 60′), Rodri, Pedri; Lamine Yamal, Mikel Oyarzabal, Álex Baena (Ferran Torres 75′).
Jornalista: Hortêncio Sanchez
Editór: Rafael Ximenes de A. Belo
