DILI, 28 Juñu 2026 (TATOLI) – Partida ikus iha Grupu J Kopa Mundiál 2026 lori drama atmosfériku ida. Selesaun Austria no Arjélia tenke fahe pontu hafoin empata 3-3 iha jogu ne’ebé iha Estádiu Arrowhead, Kansas City, Estadu Unidu Amérika (EUA), iha domingu meiudia (oras Timor-Leste).
Rezultadu empata ne’e automatikamente asegura kedas kualifikasaun ba nasaun rua ne’e ba Jornada 32 (faze eliminatória), basá ekipa rua ne’e konsege duni rekolla pontu haat (4) ida-idak. Eskoru ne’e mós fó konsekuénsia ba Iraun, ne’ebé tenke lakon sira-nia fatin iha ‘top ualu’ (terseiru lugar di’ak liu) tanba de’it pontu tolu (3).
Ho nune’e, Áustria avansa nu’udar runner-up (segundu kampeaun) hosi Grupu J, enkuantu Arjélia foti billete ba oitavu de finál liuhusi ‘golu’ terseiru lugar di’ak liu.
Golu tolu iha primeira parte
Jogu iha parte dahuluk la’o ho intensidade aas tebes. Áustria mak lansa uluk de’it presaun hodi hetan vantajen 1-0 iha minutu 28. Avansadu veteranu Marko Arnautović hatudu ninia esperiénsia hodi les armadilla offside adversáriu nian, simu pasajen furak ida hosi David Alaba, no soe bola hodi fura guarda-rede Oussama Benbot.
Arjélia la hakmatej. Sira hatán kedas ho estilu atake ne’ebé agresivu no inkansável (la hatene baruk). Hafoin kria oportunidade oioin ne’ebé seidauk muda eskoru, rekonpensa mai duni iha minutu 45.
Defeza Rafik Belghali sobu parte karuk hosi defeza austríaku no lansa suta maka’as ida ba poste besik, hodi dudu eskoru ba 1-1 ne’ebé mantein to’o intervalu.
Funu manas no golu de’it iha minutu ikus
Tama ba segunda parte, kompetisaun ne’e sai manas liután. Iha minutu 55, Áustria hamriik fali liuhusi Marcel Sabitzer. Liuhosi asisténsia ‘bonitu’ ida Konrad Laimer nian, Sabitzer fó suta ida ne’ebé sukat loos hodi halo Arjélia nia rede nakdoko (2-1).
Arjélia ne’ebé lakon nafatin puxa sira-nia tátika. Iha minutu 60, fitun boot Riyad Mahrez mosu hodi dudu fali eskoru ba empata 2-2. Hafoin golu ne’e, ritmu jogu nian neineik, bola barak liu joga iha meiu-kampu, no ekipa rua ne’e kuidadu tebes atu la halo falla iha liña kotuk.
Maibé, drama ne’ebé loos foin mosu iha minutu iha injury time:
- Minutu 90+4 (2-3): Arjélia halo estadiu tomak hakfodak. Simu pasajen furak hosi Houssem Aouar, kapitaun Riyad Mahrez suta kapás hodi lori Arjélia ba ohan no kuase garante vitória.
- Minutu 90+6 (3-3): La espera, Áustria hatudu sira-nia mentalidade “persistente (firme)”. Iha minutu ikus, Saša Kalajdžić sa’e aas hodi submete bola ho ninia kabesa ba rede Arjélia nian.
Árbitru huu kedas apitu finál hafoin golu ne’e, hodi taka jogu ho eskoru dramátiku 3-3.
Alineasaun jogadór sira
Arjélia:
Oussama Benbot; Rafik Belghali, Aïssa Mandi, Ramy Bensebaini, Jaouen Hadjam; Farès Chaïbi, Nabil Bentaleb, Ibrahim Maza; Riyad Mahrez, Houssem Aouar, Amine Gouiri.
Treinadór: Vladimir Petković
Áustria:
Alexander Schlager; David Alaba, Philipp Lienhart, Stefan Posch, Philipp Mwene; Nicolas Seiwald, Xaver Schlager, Marcel Sabitzer, Konrad Laimer; Romano Schmid, Marko Arnautović.
Treinadór: Ralf Rangnick
Jornalista: Hortêncio Sanchez
Editór: Rafael Ximenes de A. Belo
