BAUKAU, 01 Jullu 2026 (TATOLI)—Autoridade suku tolu kompostu husi Suku Haekoni, Osso-Huna no Afaloikai, Postu administrativu Baguia, Munisípiu Baukau, deside konjunta mobiliza komunidade hodi normaliza estrada pasadeira Basarwai.
Xefi Suku Osso-Huna, Postu Administrativu Baguia, Paulo dos Reis Piedade, esplika reuniaun referida hanaran Konsellu Suku ne’ebé rezulta desizaun konjunta hanesan husu kontribuisaun komunidade husi suku tolu, emprezáriu no indivíduu Baguia-oan ne’ebé iha interese apoia materiál no orsamentu nune’e hadi’a estrada mota Basarwai ho objetivu atu fasilita movimentasaun transporte iha área referida.
Notísia relevante: Pasadeira Basarwai iha Suku Haekoni estragadu kauza husi udan
“Ohin loron ami deside hamutuk husu apoiu orsamentu liuhusi kontribuisaun osan husi komunidade hodi enxe mina ba karreta ne’ebé oferese voluntariamente,” Paulo Piedade informa ba jornalista sira liuhusi telefónema, Kuarta ne’e.
Paulo relata provizoriamente apoia ne’ebé atuál hetan hanesan gabiaun (bronjong) maihusi kompañia responsavel reabilitasaun estrada Laga-Baguia, Norinco Internasionál Coorperation hamutuk hitu no lima seluk apoia husi Autoridade Suku Samalari.
Aleinde ne’e, komunidade balun apoiu materiál (fatuk) hamutuk kamioneta sanulu no serbisu kooperativa entre komunidade suku tolu liuhusi halibur fatuk no sei kontinua husu apoia kontribuisaun orsamentu komunidade nune’e aloka ba mobilizasaun materiál ba normalizasaun pasadeira iha mota Basarwai.
“Fila ba konxiénsia kada pesoál, la ezije valór no tipu kontribuisaun, más importante apoia ne’ebé fó relevante hodi hadi’a estrada,” Paulo Piedade argumenta.
Nia konfensa desizaun konjunta referida sei divulga liuhusi meiu komunikasaun iha rede sosiál hanesan grupu WhatsApp, Igreja, Facebook no mídia hodi hetan atensaun husi pesoál ne’ebé hakarak apoia ba situasaun estrada.
Nia salienta estrada diresaun referida kotu difikulta movimentasaun transporte durante fulan-rua iha-ne’ebé empata rendimentu, atividade no transfere moras bá ospitál tanba estrada Basarwai kotu kauza husi udan boot.
Entretantu, estrada diresaun Baguia Vila bá suku tolu hetan estragu iha área pasadeira Basarwai ho distánsia metru sia-resin iha-ne’ebé kotu totál iha fulan-Abríl tinan ne’e. Tanba ne’e, atu atu utrapasa presiza konstrui pasadeira.
Enkuantu, suku haat iha Postu Administrativu Baguia ne’ebé enfrenta kondisaun estrada grave ne’e ho totál populasaun hamutuk 6.851, kompostu husi Suku Afaloikai ho populasaun hamutuk 1.639, Alawa Kraik 1.934, Haekoni 2.807 no Osso-Huna hamutuk 894.
Jornalista: Natalino Belo
Editór: Xisto Freitas da Piedade
