DILI, 03 Jullu 2026 (TATOLI)—Prezidente Repúblika, José Ramos-Horta, kondekora grande orden kolár Timor-Leste ba Primeiru-Ministru no Ministru Finansa Repúblika Singapura, Lawrence Wong.
Kondekorasaun ne’e hodi rekoñese ninia kontribuisaun ba hametin amizade no kooperasaun Timor-Leste no Singapura.
Prezidente Repúblika, José Ramos-Horta, hateten katak ohin nia fó grande orden kolár ne’ebé simboliza aas liu iha Timor-Leste ba Primeiru-Ministru Lawrence Wong, tanba rekoñese ninia kompromisu forte atu haforsa amizade no kooperasaun entre Singapura no Timor-Leste.
“Iha ninia lideransa, relasaun bilaterál avansa maka’as liuliu iha dezenvolvimentu institusionál, kapasidade rekursu umanu no Timor-Leste nia integra ba rejiaun ASEAN,” Prezidente Repúblika informa iha Nia kna’ar fatin, ohin.
Primeiru-Ministru no Ministru Finansa Repúblika Singapura, Lawrence Wong, hato’o agradesimentu ba Prezidente Repúblika, José Ramos-Horta, tanba permite nia hodi hetan apresiasaun kle’an ba grande orden kolár Timor-Leste nian ne’ebé oferese ona ba nia.
“Hanesan ha’u dehan ona iha ha’u-nia diskursu foin lalais ne’e, prémiu ida-ne’e la’ós de’it rekoñesimentu ba ema ida de’it, maibé atributu ida ba ema Singapura tomak ne’ebé ajuda harii ligasaun amizade ne’ebé metin entre ita nasaun rua,” Xefe Governu afirma.
Jornalista : Alexandra da Costa
Editór : Cancio Ximenes
