DILI, 03 Jullu 2026 (TATOLI)-Partidu Kmanek Haburas Unidade Nasionál Timoroan (KHUNTO) preparadu hasoru Eleisaun Podér Lokál ne’ebé tuir planu sei realiza iha tinan 2027 ho fazeadamente ba munisípiu sira ne’ebé prienxe ona kondisaun mínima.
Xefe Bankada KHUNTO, António Verdial de Sousa, hateten katak dezde uluk KHUNTO sempre apoia Governu atu desentraliza serbisu sira ba kraik atu hakbesik liu ukun ne’e ba povu, liuhusi desentralizasaun administrativa no podér lokál.
“Partidu KHUNTO daudaun prepara-an atu hola parte”, nia hateten iha Parlamentu Nasionál, ohin.
Hodi salienta katak kuadru partidu preparadu iha munisípiu sira atu serbí nia munisípiu rasik no partidu sempre buka serbisu hamutuk ho partidu hotu, intelektuál, veteranu no parte hotu atu dezenvolve idaidak nia rai bainhira Governu sentrál fó ona podér.
Partidu mós partisipa atividade kona-ba diseminasaun lei sira kona-ba podér lokál no partisipa programa talk show sira ne’ebé hala’o husi Komisaun Nasionál Eleisaun (CNE, sigla portugés) nu’udar parte ida ba preparasaun podér lokál.
KHUNTO sei la realiza kongresu
Iha parte seluk, Xefe Bankada KHUNTO, António Verdial, dehan partidu sei la halo kongresu no konferénsia nasionál tanba realiza ona iha tinan kotuk relasiona ho preparasaun eleisaun prezidensiál iha tinan 2027.
Tuir Lei Partidu Polítiku, antes hasoru eleisaun prezidensiál iha 2027 partidu sira presiza halo uluk kongresu no konferénsia hodi hetan lejitimidade.
“Preparasaun KHUNTO nian, ba eleisaun prezidensiál rasik mak agora kontinua halo konsolidasaun sira iha territóriu nasionál hodi hametin estrutura iha baze no preparadu atu partisipa”, nia dehan.
Antes ne’e, Prezidente Komisaun Nasionál Eleisaun, José Agostinho Belo, husu ba partidu sira atu realiza konferénsia no kongresu nasionál antes hasoru eleisaun prezidensiál iha 2027.
Notísia relevante: KHUNTO selebra tinan ba da-15 ho apela ba unidade no dezenvolvimentu nasionál
Jornalista: Nelson de Sousa
Editora: Maria Auxiliadora
