DILI, 03 Jullu 2026 (TATOLI)—Primeiru-Ministru, Kay Rala Xanana Gusmão no Primeiru-Ministru no Ministru Finansa Repúblika Singapura, Lawrence Wong, iha enkontru bilaterál ne’e reafirma importánsia ba lei internasionál, diálogu no kooperasaun dame, iha iha tempu ne’ebé mundu la seguru.
“Ba nasaun ki’ik sira hanesan Timor-Leste, lei internasionál esensiál ba ita-nia soberania, ita-nia seguransa no ita-nia dezenvolvimentu,” Primeiru-Ministru, Kay Rala Xanana Gusmão, hateten iha Palásiu Governu, ohin.
Tanba, Xefe Governu ne’e dehan, husi Timor-Leste nia esperiénsia rasik hatudu katak katak disputa susar sira bele rezolve ho dame liuhusi lei, diálogu no boa-fé.
“Nune’e, ami fó valór ba Singapura nia lian neʼebé respeitu iha rejiaun no mundu iha apoiu ba dame, estabilidade no respeitu entre nasaun sira,” Xanana dehan.
Antes ne’e, Ministru Negósiu Estranjeiru no Kooperasaun, Bendito dos Santos Freitas konsidera vizita ofisiál Primeiru Ministru no Ministru Finansa Singapura, Lawrence Wong mai Timor-Leste hanesan oportunidade importante atu hametin kooperasaun bilaterál entre nasaun rua.
Ministru Bendito hatoo deklarasaun ne’e hafoin enkontru Konsellu Ministru, ohin, iha ne’ebé governante sira diskuti kona-ba programa vizita ofisiál Xefe Governu Singapura mai Timor-Leste husi loron 2 no 3 fulan Jullu.
Durante sorumutu, aprezentasaun kona-ba vizita PM Wong hatoo hosi Vise Ministra Negósiu Estranjeiru no Kooperasaun, Jesuína Maria Ferreira Gomes.
Ko’alia ba jornalista sira iha Palásiu Governu, Ministru Bendito hateten katak vizita ne’e hanesan kontinuasaun esforsu rai-rua nian atu haburas relasaun polítika, diplomátika no kooperasaun ba dezenvolvimentu.
“Nia vizita importante tebes atu hametin no reforsa tan relasaun bilaterál entre Timor-Leste no Singapura. Hanesan ita hotu hatene, iha tinan 2025, Primeiru Ministru Kay Rala Xanana Gusmão hala’o vizita ofisiál ba Singapura no entrega karta konvite ofisiál ba Primeiru Ministru Lawrence Wong atu halo vizita mai Timor-Leste,” dehan Bendito. “Ita fiar katak vizita ne’e bele iha solusaun barak liu tan ba ita-nia kooperasaun bilaterál entre nasaun rua ne’e.”
Jornalista : Alexandra da Costa
Editór : Cancio Ximenes
