DILI, 03 Jullu 2026 (TATOLI) – Governu, liuhosi Sekretaria Estadu ba Asuntu Toponímia no Organizasaun Urbana (SEATOU), hamutuk ho Autoridade Munisípiu Dili, notifika ona uma kain hamutuk 665 iha Aldeia Zero III Anin Fuik, Suku Kampung Alor, molok asina termu aseitasaun ba prosesu despezu administrativu.
Prezidente Autoridade Munisípiu Dili (PAM-Dili), Francisco dos Santos, hateten katak prosesu despezu administrativu hahú ona ho uma-kain 98 iha Aldeia Zero II, no agora Governu kontinua ba Aldeia Zero III.
Nia esplika katak, desde loron 1 Jullu, ekipa Autoridade Munisípiu Dili servisu hamutuk ho autoridade lokal Suku Kampung Alor hodi hala’o prosesu despezu administrativu ba uma kain 98 iha Aldeia Zero II.
“Ita hatene katak uma iha Aitarak-Laran, Aldeia Zero III Anin Fuik, sei tomak hela. Tanba ne’e, ita sei kontinua servisu hamutuk ho parte relevante sira atu hala’o servisu ida ne’e. Governu hakarak área ne’e mamuk tanba planu dezenvolvimentu integradu Governu nian prevé katak fatin ne’e sei dezenvolve ba interese públiku,” dehan Francisco.
Relasiona ho notifikasaun ne’e, Xefe Suku Kampung Alor, Estela Aleixo, dehan nia hahú ona fó informasaun ba komunidade iha Aldeia Zero III atu hakbesik-an ba Sede Suku Kampung Alor hodi kompleta dokumentu relevante no asina termu aseitasaun molok hakat despezu administrativu.
“Ha’u hakarak fó hatene ba uma kain hamutuk 665 ne’ebé simu ona notifikasaun husi Governu atu mai Sede Suku Kampung Alor hodi trata dokumentu relevante no asina termu aseitasaun molok hahú despezu administrativu,” dehan Estela.
Nia mós enkoraja komunidade Aldeia Zero III atukolabora ho autoridade sira durante prosesu despezu administrativu no pagamentu indemnizasaun.
Jornalista: Camilio de Sousa
Editór: Filomeno Martins
