OEKUSI, 09 Jullu 2026 (TATOLI) – Embaixadór Estraordináriu no Plenipotensiáriu Timor-Leste ba Mozambike, Luís Miguel Sequeira, kinta ne’e hala’o enkontru ho Autoridade Rejiaun Administrativa Espesiál Oekusi Ambeno (RAEOA), hodi aprezenta investór sira husi nasaun Xina atu investe ba área enerjía solár no mineiru iha Oekusi.
“Emprezáriu Zinan Yousinang, husi nasaun Xina, nia baze iha propinsia Xenon, sira investe ona iha Mozambike durante tinan 20, iha área oioin hanesan prosesamentu mineiru, ospitaliti, fabrikasaun no enerjía solar, maibé ohin sira mai Oekusi ita aprezenta ba Autoridade RAEOA, tanba sira iha interese atu investe iha enerjía solár no mineiru,” nia hateten ba jornalista sira hafoin remata enkontru ho Prezidente Autoridade, kinta lorokraik ne’e.
Notísia relevante:PA RAEOA ho Embaixadora Xina diskute futuru kooperasaun ba dezenvolvimentu agro-floresta
Nia informa, antes dezloka mai Oekusi, diplomata timoroan ne’e, aprezenta uluk ba iha Prezidente Repúblika, José-Ramos Horta no Vise Primeiru-Ministru Francisco Kalbuadi Lay, inklui mós Ministreu Petroleu no Mineiru, kona-ba asuntu investimentu ne’e.
“Emprezáriu sira-ne’e hatudu sira-nia manifesta atu investe iha Timor-Leste, espesiálmente iha rai ketan Oekusi, tan ne’e mak ohin ami mai, atu haree ambiénte negósiu nian ne’e no hatene liu tan saida mak sira bele halo iha Oekusi, entaun ohin ami hahú ona inisá diskusaun, durante iha konversa iha ona rezultadu atu investe iha enerjía solár ho minerasaun, ne’ebé sei hein faze tuir mai entre Autoridade RAEOA ho kompañia, atu dezenvolve MoU ida antes hahú,” nia hateten.
Notísia relevante:Empreza Brilliant Holdings husi Honkong hakarak investe rekursu minerál iha Oekusi
Bainhira jornalista sira tenta asuntu ne’e ho Prezidente Autoridade RAEOA R’egio da Cruz Salu, maibé rejeita atu fó komentáriu tanba sei koordena fali ho Entidade Tuteladu Superentendente RAEOA Primeiru-Ministru (PM) Kay Rala Xanana Gusmão.
“Ita lalika ko’alia asuntu ne’e tanba ita sei husu autorizasaun husi Entidade Tuteladu Superentendente RAEOA maka Primeiru-Ministru, bainhira iha ona selebrasaun memoramdun ida, ita ita bele ko’alia klean liu tan,” nia hateten ba jornalista sira.
Jornalista: Abílio Elo Nini
Editór: Rafael Ximenes de A. Belo
