DILI, 13 Jullu 2026 (TATOLI)-Timor-Leste sei organiza eventuinternasionál haat iha fulan-Agostu tinan ne’e mak hanesan Horta Show, Atividade Semana Verde, Dili Maratona, no Konferénsia Premiadu Nobel da Pas.
Atu realiza atividade ida-ne’e Komisaun Organizador Dili Internasionál Maratona (DIM) ne’ebé lidera husi Vise-Primeiru-Ministru Koordenadór Asuntu Ekonómiku, Francisco Kalbuadi Lay, realiza ohin enkontru ho Prezidente Repúblika, José Ramos-Horta, hodi diskute preparativu ba eventu importante referidu.
Atividade importante haat ne’e seuihahú iha loron 04 Agostu ho Horta Show, tanba inisiativa ida-ne’e mai husi Prezidente Repúblika rasik tanba hetan apoiu husi Primeiru-Ministru, Xanana Gusmão.
“Iha loron 06 Agostu Atividade Semana Verde. Iha atividade lubuk ida ne’ebé ita sei halo, no 08 Agostu ita hahú ho Dili Internasionál Maratona. Iha 23 to’o 25 realiza Konferénsia Premiadu Nobel da Pas”, Kalbuadi Lay informa iha Palásiu Prezidénsial Bairu Pité, Dili, ohin.
Realizasaun atividade Dili Internasionál Maratona ida-ne’e liuhusi koordenasaun Ministériu Juventude, Desportu, Arte no Kultura (MJDAK) no Federasaun Atletizmu mak organiza Dili Maratona ne’ebé sei envolve atleta nasionál no internasionál.
Tuir nia, daudaun atleta sira ne’ebé rejista ona, kompostu hosi nasionál 100-resin no internasionál 68.
Atividade Konferénsia Internasionál Premiadu Nobel da Pas ida-ne’e Governu hamutuk ho Palásiu Prezidénsial mak realiza iha Sentru Konvesaun Dili, ne’ebé sei envolve ema rihun, kompostu hosi estudante universitáriu sira, sosiedade sivíl, Parlamentu Nasionál no ajénsia internasionál sira, tanba Prezidente Repúblika, José Ramos-Horta, halo ona kontaktu ba Premiadu Nobel da Pas na’in-rua mak sei mai partisipa iha eventu ne’e.
Kona-ba atividade Semana Matak envolve Ministériu Agrikultura, Pekuária, Peska, no Floresta hodi haree ai-oan hira mak kuda ona no ninia benefísiu sira. Aleinde ne’e, sei iha mós kulinária ka espozisaun ne’ebé sei haree direta husi Ministériu Komérsiu no Indústria, ne’ebé sei realiza iha Palásiu Prezidensiál no Sentru Konvesaun Dili.
“Ho atividade sira ne’e, ohin ita mai halo breafing no hetan orientasaun lubuk ida husi Prezidente Repúblika. Atividade ne’e sei envolve mídia sira halo kobertura, nune’e lori mundu mai iha Timor-Leste no lori Timor-Leste ba mundu”, Kalbuadi Lay hateten.
Ekipa ne’ebé partisia enkontru ho Xefe Estadu mak hanesan Vise-Primeiru-Ministru, Ministru Koordenadór Asuntu Ekonómiku Francisco Kalbuadi Lay, Ministru Juventude, Desportu, Arte no Kultura, Nelyo Isaac Sarmento, Sekretáriu Estadu Komunikasaun Sosiál, Expedito Ximenes, Ministru Agrikultura, Pekuária, Peska no Floresta, Marcos da Cruz, no seluk tan.
Jornalista: Arminda Fonseca
Editora: Maria Auxiliadora
