DILI, 15 Jullu 2026 (TATOLI)—Prezidente Repúblika, José Ramos-Horta husu Agência Notisioza Timor-Leste TATOLI, Institutu Públiku (TATOLI, I.P) atu kontinua servisu fahe informasaun no hametin unidade iha rai-laran.
Prezidente Repúblika, José Ramos- Horta, hato’o parabéns ba aniversáriu Tatoli ba da-10 (17 Jullu 2016 – 26 Jullu 2026) ne’ebé sei selebra iha 27 Jullu.
“Imi-nia esforsu mós kontribui ba hametin liután unidade iha rai-laran, parabens, parabens,” Prezidente Ramos-Horta hateten ba Agência Tatoli, ohin.
Aleinde ne’e Xefe Estadu fó parabens mós ba jornalista sira hotu ne’ebé servisu no jerente sira-ne’ebé dirije ajénsia ne’e hodi fahe informasaun kona-ba realidade nasionál ba dezenvolvimentu ita-nia rain.
Ajénsia TATOLI, I.P nu’udár ajénsia ofisiál Estadu Timor-Leste nian. Ezisténsia TATOLI, I.P. maihusi inisiativa Sekretaria Estadu Komunikasaun Sosiál (SEKOMS), iha 2012- 2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu- Ministru aprova ANTIL sai TATOLI, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (I.P.).
Objetivu estabelese ajénsia TATOLI, I.P. sai fonte informasaun ofisiál Estadu Timor- Leste ne’ebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karakterístika; rapidéz no rigór, maibé labele ignora nia rigorozidade hanesan akurásia, independente, inzenta, klareza no nafatin iha integridade no mós kredibilidade.
Jornalista : Alexandra da Costa
Editór : Cancio Ximenes
