BOBONARU, 15 Jullu 2026 (TATOLI) – Grupu benefisiáriu sanulu iha munisípiu Bobonaru devolve rendimentu $122 ba Sentru Dezenvolvimentu Aldeia (CDA), liuhusi mekanizmu fundu rotativu husi Programa Revitalizasaun Komunitária (PRK), ne’ebé implementa husi Ministeriu Dezenvolvimentu Rurál no Abitasaun Komunitária (MDRHK).
Koordenadór MDRHK Bobonaru, Merlando da Costa Belo, hateten katak grupu sira ne’e estabelese iha tinan 2024 no halo atividade hanesan haki’ak animál, ikan, ortikultura no seluk tan.
“Rendimentu $122 mai husi grupu Korluli-Maliana, Balibó no Atabae, maibé Atabae mak rendimentu maka’as liu tanba sira iha ortikultura ho fa’an karau”, nia informa iha sede suku Holsa, kuarta-feira ne’e.
Merlando esplika katak iha 2024, programa ne’e implementa iha aldeia sanulu, ne’ebé kada aldeia simu apoiu entre rihun $40 no $50. Iha 2025, programa ne’e estende ba aldeia no grupu hamutuk 32, ne’ebé kada grupu simu apoiu $14. ho montante investimentu ne’ebé varia tuir nesesidade no tipu atividade produtiva.
“Grupu sira iha 2025 seidauk iha rendimentu, maibé sira sei kolleta 20% ba kedas CDA hodi hamoris fali grupu foun iha aldeia ne’e”, nia hateten.
Koordenadór ne’e dehan programa hahú implementa iha 2024 iha aldeia sanulu, hafoin espande ba aldeia 32, inklui benefisiáriu individuál iha 2025, no agora alarga ba aldeia 25 seluk, totaliza aldeia 65 iha munisípiu referidu.
Merlando hateten maioria atividade sira ne’ebé implementa iha programa ne’e mak iha área pekuária, ortikultura integrada no atividade produtiva seluk. Iha Mota-Ain, grupu inidviduál ida estabelese kafetária, enkuantu atividade produtiva iha hanesan Korluli kontinua la’o di’ak no fó rendimentu ba benefisiáriu sira.
“Ha’u aprezenta ona rezultadu iha nivel nasionál katak Bobonaru hatudu rezultadu di’ak. Maski iha fatin balun atividade seidauk la’o di’ak, tanba influensia ho situasaun klima, maibé atividade sira la para permanente no sei kontinua bainhira kondisaun klima di’ak fali”, dehan.
Iha sorin seluk, Xefe Suku Holsa, António Santa Cruz, hato’o apresiasaun ba MDRHK tanba programa ne’e fó benefísiu direta ba komunidade no ajuda kria oportunidade serbisu iha nivel suku.
“Programa ida-ne’e importante tebes, tanba hahú husi baze no kria postu serbisu ba komunidade. Ho atividade produtiva sira ne’e, ita bele hamenus dependénsia joven sira ba serbisu iha rai-li’ur no fó oportunidade ba sira atu dezenvolve ekonomia iha sira-nia suku no aldeia rasik”, António Santa Cruz salienta.
Objetivu prinsipál husi implementasaun Programa Revitalizasaun Komunitária mak atu dudu dezenvolvimentu ekonómiku no hadi’a kondisaun moris populasaun iha área rurál. Programa ne’e foka liu ba haforsa produsaun lokál hodi hametin ekonomia familiár.
Objetivu espesífiku sira inklui: Hasa’e Produsaun Lokál: Apoia grupu komunidade sira iha área agrikultura, peskas, pekuária (hanesan hakiak manu ka ikan) no turizmu. Hametin Ekonomia Familiár: Kria rendimentu sustentavel ba populasaun hodi hasa’e bem-estar no hadi’a kbiit sosiuekonómiku.
Notísia relevante: MDRHK aprezenta rezultadu Programa Abitasaun-Revitalizasaun Komunitária no OJE 2026
Fornese Merkadu: Garante produtu lokál hodi sustenta nesesidade merkadu lokál no nasionál (inklui Programa Merenda Eskolár). Kapasita Komunidade: Fó formasaun kona-ba lideransa, jestaun finanseira, no empreendedorizmu atu komunidade bele jere rasik sira-nia projetu. Harii Infraestrutura Bázika: Fornese fasilidade públika importante sira hanesan bee-moos, sintina públika, no sistema irrigasaun.
Notísia relevante: MDRHK: Utiliza subvensaun tuir dalan
Jornalista: Sergio da Cruz
Editora: Maria Auxiliadora
