DILI, 17 Jullu 2026 (TATOLI)—Federasaun Futebol Timor-Leste (FFTL), sesta ne’e, realiza formasaun ba treinadór futsál hamutuk na’in-16 ho nivel 1 ho tema prinsipál “AFC FUTSAL COACHING CERTIFICATE COURSE – LEVEL 1”, iha salaun Xanana Sport Centre Dili.
Husi númeru partisipante ne’ebé iha kompostu husi mane na’in-12 no feto na’in-haat (4). Formasaun ne’e sei hala’o durante semana-ida, ne’ebe hahú husi loron 17 to’o 22 jullu 2026, ho fasilitadór ba formasaun husi AFC, Joshuah Stan Vaz, no iha formasaun ne’e fahe ba parte rua, dadeer aprende materia no lorokraik hala’o prátika iha kampu.
Iha serimónia abertura, Sekretáriu Jerál FFTL, José Adilson Ribeiro, husu ba partisipante sira atu aproveita didi’ak oportunidade ida-ne’e hodi aprende di’ak liután, tanba atu hetan jogadór ne’ebé kualidade presiza mós treinadór ida-ne’ebe kualidade.
“Rekursu treinadór ba futeból no futsal iha Timor-Leste sei menus, tanba ne’e liuhusi formasaun hirak ne’e ho intensaun hakarak forma treinadór sira barak no ho kualidade hodi dezenvolve di’ak liután talentu labarik no joven sira-nian hodi garante ba kualidade jogadór sira-nian ba futuru,” José Adilson Ribeiro hateten iha nia intervensaun.
Sekretáriu Jerál FFTL ne’e enkoraja treinadór sira atu nafatin iha vontade no dixiplina hodi aprende matéria ne’ebe formadór fó.
Sorin seluk, Prezidente Assosiasaun Treinadóres Futebol Timor-Leste (ATFTL), Van Basten Koy, mós husu ba partisipante sira atu aproveita oportunidade hodi aprende didi’ak, tanba dezenvolvimentu futebol no futsal presiza mós treinadór sira.
“Oportunidade ne’e di’ak tebes ba ita boot sira atu aprende, tanba matéria sira-ne’ebe aprende sei sai hanesan bukae ida atu kontinua dezenvolve talentu jogadór sira-nian ba futuru, tanba partisipante sira maioria mak jogadór profisionál. Espera, esperiénsia ne’ebe hetan la hotu de’it iha ne’e, maibé bele dezenvolve mós ba labarik no joven sira-nia talentu iha terrenu liuliu iha bairru sira,” Van Basten hateten.
Aleinde ne’e, Sekretáriu Jerál Assosiasaun Futsal Timor-Leste (AFTL), Mario Guterres husu ba partisipante sira atu nafatin kaderiza an iha formasaun sira hodi garante dezenvolvimentu futsal nian iha Timor-Leste ba futuru.
“Tanba prioridade importante ida-ne’ebe atu dezenvolve futsal mak formasaun ba treinadór, nune’e espera ho oportunidade hirak ne’e bele lori mudansa balun ba kadernizasaun jogadór futsál iha Timor-Leste,” nia dehan.
Jornalista : Hortêncio Sanchez
Editór : Cancio Ximenes
