DILI, 20 fevereiru 2020 (TATOLI) – Unidade Polísia Militár (PM), FALINTIL-Forsa Defeza Timor-Leste (F-FDTL) hahú halo ezersísiu hodi prepara ba antesipasaun situasaun seguransa durante impase polítika.
Notísia Relevante : Polisia Militár Apela Ba Juventude Hakmatek
Ezersísiu fíziku ba membru PM na’in 66 hosi pelotaun rua hala’o iha kuartél Polísia Militár, Kintál Boot, Dili, ne’ebé sira nia instrutór mai husi Polísia Ezérsitu Brazil.
Ezersísiu ne’e tuir instrusaun Polísia Militár nian no mós bazeia orientasaun diretiva konjuntu númeru 01/2020 hosi Xefe Estadu Maiór F-FDTL ho komandante jerál Polisia Nasional Timor-Leste (PNTL) hodi prepara ba seguransa nasionál perante periodu impase polítika.
Komandante Polísia Militár, Major Abel da Costa “Niki” hateten, ezersísiu ne’e hodi halo preparasaun di’ak liu tan bainhira mosu asaun sira hanesan manifestasaun hasoru Estadu ne’ebé bele rezulta distúrbiu ruma.
“Polísia Militár prontu kolabora ho PNTL atu asegura situasaun distúrbiu ruma karik mosu,” hateten Majór Niki ba jornalista sira.
Nia relata katak, formasaun ne’e hala’o tiha ona durante tinan ida resin no ohin hanesan kontinuasaun demonstrasaun ezersísiu fíziku atu bele aguenta ho situasaun saida de’it mak mosu durante oras 24 nia laran iha territóriu nasionál.
Kapitaun Polisia Ezérsitu Brazil, Rafael Xavier Gonçalves hatete, sira nia parte apoiu formasaun ba Polísia Militár dezde estabelese akordu kooperasaun iha 2005 hodi mellora liu tan kapasidade atuasaun membru PM sira nian iha terrenu.
Nia dehan, ba oin kontinua servisu hamutuk ho Polisia Militár tanba Brazil hanesan nasaun amigu di’ak ho Timor-Leste.
Jornalista : Nelson de Sousa
Editór : Francisco Simões
