OÉ-CUSSE, 18 jullu 2024 (TATOLI) – Agrikultór sira-nia iha Kolomboe-Ana, suku Lifau, hahú kuda ona hare hafoin Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretaria Rejionál ba Asuntu Agrikultura orienta Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P) halo normalizasaun ba iriigasaun ne’ebé danifika tanba kauza husi udan.
“Ohin, ami kuda hare iha natar Kolomboe-Ana, tanba nia tempu mak fulan ida-ne’e. Ami tenke agradese ba autoridade, tanba kanu bee foin daudaun loke foun ne’e, estraga tiha iha tempu udan”, Domingos Eco hanesan natar-na’in informa iha suku Lifau, ohin.
Notísia relevante: Autoridade orienta IGE loke bee-dalan ba natar ektare 40 iha Lifau
Nia dehan tipu kuda hare iha natar sira ne’e maioria uza sistema modern, tanba estensionista sira hanorin ona atu kuda tuir liña ho nia medida sentimu 20 no 40.
“Tinan ida ami halai natar dala-ida de’it, labele dala-rua tanba bee la sufisiente. Nune’e mak ami hahú iha Jullu ne’e, sei kolleta iha Novembru 2024”, nia adianta.
Notísia relevante: Autoridade solusiona bee ba natar ektare 40 iha Lifau
Kamponeza Modesta Cau mós espera katak ba futuru Governu tau-matan ba natar sira, liuliu apoia pestisida hodi kombate peste lakataru.
“Extensionísta sira hanorin ami atu kuda hare halo liña, maibé ami husu nafatin ba Governu, liuliu servisu agrikultura tau-matan ba ami. Ohin, ami kuda ona, molok atu isin, dalaruma mosu moras, hare nia tahan sai mean no kada tinan hetan ataka beibeik husi ular oan”, nia sujere.
Antes ne’e, Sekretária Rejionál ba Asuntu Agrikultura, Filomena Sila, promete sei tau prioridade ba ai-moruk adubu orgániku hodi apoia ba agrikultór sira atu kombate peste lakataru.
Notísia relevante: RAEOA prevista adubu orgániku AMO iha orsamentu retifikativu 2024
Jornalista: Abílio Elo Nini
Editora: Maria Auxiliadora
