DILI, 19 jullu 2024 (TATOLI)—Deputada husi bankada CNRT, Cedelízia Farria dos Santos, hateten altera lei pensaun vitalísia kontinua sai prioridade iha lejislatura daneen ne’e, no agora hein de’it atu aprezenta inisiativa hodi halo alterasaun.
Notísia Relevante: Xefe Estadu ejize PN no Governu altera Lei Pensaun Vitalisia
Nia dehan, iha internál bankada nian komesa ko’alia asuntu ne’e maibé ofisialmente atu lori inisiativa mai plenária ida-ne’e seidauk tama ba ajenda, tanba ne’e hein de’it atu aprezenta inisiativa.
“Ita hein de’it, ha’u labele hateten lai, tanba ne’e Prezidente Parlamentu mak bele ko’alia, ne’ebé ko’alia la ofisialmente komesa ko’alia iha bankada mós ami ko’alia asuntu ne’e. Maibé, ofisialmente atu lori mai plenária ami seidauk tama ajenda,” nia hateten ba Agência Tatoli iha resintu Parlamentu Nasionál, sesta ne’e.
Deputada husi bankada Governu ne’e haree ba asuntu finanseiru husi tinan ba tinan mak aumenta beibeik pensaun vitalísia ne’e, fó todan ba orsamentu Estadu no ema barak preokupa to’o tinan 2034, Timor-Leste tama ba presipísiu orsamentál ne’e tenke hanoin.
Nia dehan, atu altera ka halakon pensaun vitalísia bele integra ba seguransa sosiál, maibé atu halakon pensaun vitalísia inisiativa labele mai husi bankada ida ka deputadu ida de’it maibé tenke mai husi deputadu maiória.
Notísia Relevante: Reajenda diskusaun alterasaun lei Pensaun Vitalísia hein reuniaun líder bankada
“Inisiativa atu halo alterasaun ba lei pensaun vitalísia ne’e, labele mai husi bankada ida de’it ka Deputadu ida de’it, tenke mai husi maiória Deputadu sira,” nia dehan.
Deputadu husi bankada CNRT ne’e hateten, alterasaun lei pensaun vitalísia la’ós seidauk halo maibé ida uluk ne’e halo tiha alterasaun iha buat barak no redús tiha ona, hanesan uluk saláriu tenke 100% no iha asesu ba karreta sira-ne’ebé transporta mai, maibé iha alterasaun dahuluk ne’e bainhira CNRT kaer ukun halo tiha ona alterasaun.
“Ita atu alter aka halo lakon kompletu ne’e, ha’u hanoin ida-ne’e sai ona esforsu Deputadu balun hanoin konkorda halo alterasaun ida-ne’e,” nia hateten.
Antes ne’e, Deputadu bankada FRETILIN, Antoninho Bianco, hateten ida-ne’e husu ba bankada Governu sira kona-ba atu aprezenta inisitiva no ajenda.
“Maibé, lei bara-barak mak iha programa Governu depois lei ne’ebé ligasaun ho Parlamentu. Klaru, FRETILIN partidu ne’ebé ninia hanoin di’ak ba serbisu rai ida-ne’e, lei saida de’it mai ami sei fó kontribuisaun atu halo redusaun ka atu halo lei. Prinsípiu mak hametin buat ne’ebé iha ona, hadi’a buat ne’ebé seidauk di’ak no haburas buat sira-ne’e iha,” Deputadu husi bankada opozisaun ne’e hateten.
Entretentu, Prezidente Repúblika (PR), José Ramos Horta, kontinua preokupa ho lei pensaun vitalísia ne’ebé habokur de’it ema balun no ema balun kontinua moris iha susar nia laran, nune’e ezije Parlamentu Nasionál ho Governu atu halo alterasaun.
Notísia Relevante: Alterasaun lei pensaun vitalísia kaduka bele kontinua iha lejislatura daneen
Jornalista : Nelson de Sousa
Editór : Cancio Ximenes
