DÍLI, 30 Juñu 2026 (TATOLI – Autoridade Inspesaun no Fiskalizasaun Atividade Ekonómika no Sanitária Alimentár (AIFAESA-Sigla Portugés) selebra aniversáriu ba dala-10 no destaka importánsia atu kontinua mellora servisu ho integridade, profesionalizmu no evita subornu.
Iha serimónia aniversáriu ho tema “Husi Asaun ba Impaktu Real”, Inspetora-Jerál AIFAESA, Odete Viegas hato’o katak servisu AIFAESA nian ne’ebé durante ne’e hala’o ona hahú hatudu rezultadu di’ak.
Nia dehan maski progresu barak atinji ona, maibé AIFAESA nafatin firmi ba ninia komprimisu hodi nafatin buka atu mellora tan ninia prestasaun servisu iha futuru.
Tanba ne’e, Odete husu ba funsionáriu sira atu hala’o sira-nia knaar ho profesionalizmu no dedikasaun tomak ba nasaun no povu.
Nia enkoraja funsionáriu sira atu evita komete irregularidade ne’ebé bele fó impaktu ba povu no nasaun.
“Evita simu subornu husi operadór ekonómiku sira. Entaun tenke iha sentidu pertense ba instituisaun, no labele hafoer instituisaun nia naran tanba de’it interese privadu,” dehan Odete.
Diretora ne’e salienta katak, maski AIFAESA menus rekursu umanu, rekursu finanseiru, infraestrutura no fasilidade seluk, maibe nia dehan “dezafiu hirak-ne’e lasai obstákulu ba AIFAESA atu kontinua hala’o ninia servisu.”
Aleinde semináriu nasionál no misa agradesimentu, AIFAESA mos realiza atividade seluk hanesan jogu futsal, tenis meza no kompetisaun kulinária hodi komemora ezisténsia instituisaun públika ne’e.
Jornalista: Alexandra da Costa
Editor: Filomeno Martins
