MALIANA, 30 marsu 2023 (TATOLI) – Administradór postu administrativu (APA) Maliana, munisípiu Bobonaro, Tomás Laco-Loe, husu ba komunidade sira atu partisipa másimu iha eleisaun parlamentár nune’e hasa’e taxa partisipasaun.
Notísia relevante: CNE husu ofisiál supervizaun eleitorál 170 iha Bobonaro garante independénsia iha eleisaun
“Ha’u atu hatete de’it katak ita-boot sira mak hanesan jerasaun foun rai ida-ne’e, ne’ebé hanesan sidadaun rai ida-ne’e nia oan tenke partisipa másimu iha eleisaun atu hili ita nia na’i-ulun sira, eleisaun ne’e tinan lima dala-ida, ne’ebé mai ita hotu-hotu ba partisipa,” nia koa’lia iha Maliana, kinta ne’e.
Tomás dehan, Timor-Leste adota sistema demokrasia tanba sidadaun sira iha direitu atu hili partidu tuir nia konsiénsia no hakarak.
“Ita sente katak partidu ida-ne’e mak di’ak, ha’u hili ida ne’e, maibé kuandu ita obriga ema ida vota tuir partidu ida, ne’e krime eleitorál,” administradór ne’e hatene
Enkuantu partidu polítiku ne’ebé sei konkore iha eleisaun parlamentár tinan ne’e mak hanesan:
- Partidu Dezenvolvimentu Nasionál (PDN)
- Partidu Liberta Povu Aileba (PLPA)
- Partidu Libertasaun Popular (PLP)
- Partidu Demokrátiku (PD)
- Kmanek Haburas Unidade Nasional Timor Oan (KHUNTO)
- Partidu Os Verdes de Timor (PVT)
- Uniaun Demokrátika Timorense (UDT)
- Partidu Unidade Dezenvolvimentu Demokrátiku (PUDD)
- Partidu Republikanu (PR)
- Unidade Nasional Demokrátika Rezisténsia Timorense (UNDERTIM)
- Frente Revolusionária Timor-Leste Independente (FRETILIN)
- Kongressu Nasionál Rekonstrusaun Timorense (CNRT)
- Sentru Asaun Sosiál Demokrata Timorense (CASDT)
- Movimentu Popular Libertasaun Maubere (MPLM)
- Partidu Sosialista Timor (PST)
- Partidu Demokrata Kristaun (PDC)
- Asosiasaun Popular Monarkia Timorense (APMT)
Enkuantu eleisaun parlamentár tinan ne’e munisipiu Bobonaro iha sentru votasaun 150 no estasaun votu 170 kobre suku 50 no postu administrativu neen.
Notísia relevante: PPN husu parte hotu asegura Eleisaun Parlamentár la’o ho dame
Jornálista: Sergio da Cruz
Editór: Evaristo Soares Martins
