DILI, 12 Jullu 2025 (TATOLI)–Bee Timor-Leste, Empreza Públika (BTL,E.P) aprezenta ona rezultadu finál husi estudu viabilidade kona-ba dada bee husi mota Railaku, munisípiu Ermera mai Dili ba Konsellu Administrasaun Fundu Infrastrutura (KAFI).
Prezidente Komisaun Ezekutiva BTL, E.P, Gustavo da Cruz, hateten, empreza internasionál Dongsung halo estudu viabilidade ne’e no finaliza ona iha fulan hirak ba kotuk, ne’ebé ninia relatóriu mós finaliza ona, nune’e hatudu viável no sei hakat ba estapa tuir mai.
“Ami aprezenta ona rezultadu husi estudu ne’e ba KAFI dala-rua, maibé sei halo revizaun ba métodu ne’ebé atu uza, tanba iha opsaun rua mak ita atu uza, kona-ba halo barrajen (dam) husi Railaku mai no seluk iha IX Governu, ha’u hanoin halo kaptasaun bee hanesan iha Tohumeta nian ne’e atu reforsa rekursu bee iha Dili,” Gustavo da Cruz, informa ba Ajénsia TATOLI, foin lalais ne’e, iha ninia knaar fatin, Kaikoli.
Notísia relevante : Empreza Dongsung finaliza estudu viabilidade dada bee husi Railaku-Gleno mai Dili
Ho opsaun rua ne’e daudaun BTL prepara hela termu referénsia detallu ka estudu báziku balun atubele halo implementasaun, tanba ida-ne’e liga ho projetu Dili sentrál.
Antes ne’e, Governu liuhusi Ministru Obra Públika, Salvador Eugénio Soares dos Reis Pires (Governu anteriór), asina iha loron 22 Agostu 2019, kontratu ho empreza internasionál husi Tailándia no Koreia atu halo estudu pré-viabilidade no estudu viabilidade ba projetu dada bee-moos husi mota Railaku no Glenu, munisípiu Ermera mai Dili.
Empreza ne’e maka Team Consulting Engineer and Management PCL, Thailándia in JV With ATT, Consultations Company Limited, Association With Thailand and in CQ2, Engineering Consultancy ne’ebé konsórsiu ho empreza Diversu Unipessoal, Lda, inklui Dognsung Enegineering Co. Ltd, Korea and in Association, ne’ebé konsórsiu ho empreza Kai Watu Kmanek Consultant Unipessoal, Lda.
Empreza rua ne’e manán konkursu públiku liuhusi prosesu Komisaun Nasionál Aprovizionamentu (CNA, sigla portugés) ho orsamentu millaun $1, ho durasaun estudu hahú husi Agostu 2019 to’o Janeiru 2020 (durante fulan-lima) ho distánsia kilómetru 30-resin husi Ermera mai Dili.
Jornalista : Arminda Fonseca
Editora : Julia Chatarina
