BAUKAU, 12 Agostu 2025 (TATOLI)–Veteranu Cornélio Gama ‘L7’ eleitu nu’udár Prezidente Konsellu Munisipál Kombatente Libertasaun Nasionál (CMCLN-sigla portugeza) Baukau ba periodu tinan-lima (2025-2030).
Prezidente Meza Segunda Konferénsia, Cipriano de Castro “Mascot” esplika konferénsia CMCLN iha Baukau rezulta pakote Cornelio Gama ‘L7’ eleitu nu’udár Prezidente hafoin halakon pakote Prezidente Sesante Fernando ‘Beredu’u’ Gusmão ho tótal votu 184 husi konfresista hamutuk 309.
“Rezultadu konferénsia, L7 nia pakote mak sai vensedór iha Munisipiu Baukau ho votu 184,” Prezidente Meza hateten iha Sentru Konvensaun Baukau, Vila Antiga, Baukau, Tersa ne’e.
Pakote L7 kompostu husi Cornelio da Conceição Gama ‘L7’ (prezidente), Roberto Carlos ‘Tarido” (membru), Marçal da Silva ‘Waikia’ (membru), Sidónio Ximenes ‘Maunanis’ (membru) no Agostinho Correia ‘Lafaek’ (sekretáriu jerál).
Notísia relevante: CMCLN Baukau realiza konferénsia ba daruak hili estrutura períodu tinan-lima
Enkuantu, pakote daruak lideradu husi Prezidente CMCLN Baukau Sesante Fernando ‘Beredu’u’ Gusmão (prezidente), Pedro de Oliveira ‘Nurak’ (sekretáriu jerál) no membru sira hanesan João Ximenes ‘Samea’, Cipriano de Castro ‘Mascot’ no Acacio Nicolao ‘Udang’.
“Demokrasia mak hanesan ne’e, iha diskusaun no debate, maibé ikusmai konferénsia mak determina desizaun ita hotu halo tuir,” Mascot informa.
Mascot relata liuhosi eleisaun, konfresista sira fó votus ba pakote L7 hamutuk 184 no halakon pakote Fernando ‘Beredu’u’ Gusmão ne’ebé hetan de’it votus 120, enkuantu konfresista na’in-lima lakon votu tanba tarde tuir eleisaun.
Durante konferénsia hala’o ho ajenda sira hanesan kada pakote aprezenta nia planu prioridade antes hakat ba faze votasaun, iha-ne’ebé durante votasaun hala’o ho demokrasia hodi rezulta estrutura foun ba mandantu tinan-lima husi 2025 to’o 2030.
Aleinde ne’e, konferénsia CMCLN iha Baukau iha loron dahuluk rezulta Mário Nicolau Marito dos Reis eleitu hodi reprezenta veteranu Baukau iha Nasionál hafoin halakon pakote rua seluk hanesan João Buka Tuir no Fernando.
Entretantu, Konferénsia Munisipál CMCLN Baukau partisipa husi konfresista ne’ebé maihosi postu administrativu neen ho totál na’in-309 ne’ebé maioria husi veteranu dedikasaun eskluziva grau 8-14, 15-19 no 20-24.
Husi totál númeru referidu maihusi kada postu administrativu na’in-50 hanesan Postu Administrativu Baukau Vila, Baguia, Venilale, Vemasse, Laga no Kelikai inklui na’in-sia husi estrutura munisipál sesante.
Biografia
Prezidente CMCLN Baukau Eleitu, Cornélio da Conceição Gama moris iha Suku Saelari, Postu Administrativu Laga, 16 Jullu 1945, nu’udár eis gerilleiru iha Forsa Armada Libertasaun Nasionál Timor-Leste (FALINTIL) ho kódigu Eli Fohorai-Boot ka koñesidu ho naran L7.
Eis komandante iha área sentru leste ne’e rejistradu nu’udár eis deputadu iha Parlamentu Nasionál (PN) reprezenta partidu UNDERTIM no kontinua envolve iha Partidu Libertasaun Populár (PLP) husi tinan-2017 to’o 2023 no agora hanesan kuadru FRETILIN.
L7 hamutuk maun-alin na’in neen kompostu feto tolu no mane tolu. Nia hahú envolve iha vida militár bainhira sai tropa Portugés no hafoin ne’e inklina ba FRETILIN sai forsa FALINTIL no funda mós organizasaun rezisténsia Sagrada Família iha tinan-1989.
Hafoin Timor-Leste hetan Libertasaun Nasionál, L7 simu medalla rua husi Estadu kompostu Orden Gerilia iha tinan-2006 no kondekoradu ho medalla Orden Timor iha tinan-2018.
Jornalista: Natalino Belo
Editór: Xisto Freitas da Piedade
