KEFAMENANU, 11 novembru 2022 (TATOLI) – Konsellu Rejionál Nasionál Artezanatu (DEKRANASDA, sigla indonézia), distritu Timur Tengah Utara (TTU), provínsia Nusa Tenggara Timur (NTT), Repúblika Indonézia, hakarak atu lidera grupu feto sira hosi TTU vizita grupu inovativu sira iha Rejiaun Administrativa Espesiál Oé-Cusse Ambeno (RAEOA).
Objetivu hosi atividade vizita ofisiál ne’e hanesan estudu komparattivu ba grupu inovativu sira ne’ebé eziste ona iha RAEOA, hodi promove diskusaun téknika no ideia inovativu hodi kompleta ba malu.
Notísia relevante: Eusabius Binsasi lidera ekipa delegasaun RAEOA vizita DEKRANASDA TTU
Sentimentu ksolok ne’e hato’o hosi Diretora DEKRANASDA TTU, Susana Binsasi Sarumaha, iha ámbitu simu vizita ofisiál ekipa delegasaun hosi RAEOA lideradu Adjuntu Prezidente Autoridade RAEOA bainhira hala’o vizita ofisiál iha sentru DEKRANASDA TTU, kuarta ne’e.
Nia sente kontente no agradese, tanba hetan vizita bainaka espesiál hosi nasaun viziñu Timor-Leste no Indonézia espesiál Oé-Cusse Ambeno.
“Ami promete iha tempu badak bele hala’o mós vizita ofisiál ba RAEOA hanesan estudu komparativu ba grupu inovativu sira, liuliu grupu inan feto sira, hodi promove diskusaun atu kompleta ba malu kona-bá ideia inovasaun nian,” Susana Binsasi Sarumaha, ko’alia iha ámbitu ne’e.
Responsável feto potensiál TTU ne’e informa, Oé-Cusse ho TTU sei iha relasaun família hatudu ltradisaun kulturál ho lian baikeno kuaze hanesan.
“Tán ne’e ho oportunidade vizita ofisiál ne’e ita bele hametin liután ita-nia kooperasaun ba futuru, maibé ami promete ona sei husu autoridade sira atu autoriza no fasilita ami atu ba vizita mós grupu inovativu sira iha Oé-Cusse ho intensaun atu haree no observa buka referénsia balu atu ita kompleta ba malu, liuliu kona-bá ideia-ideia inovativu sira,” nia promete.
Adjuntu Prezidente Autoridade RAEOA ba Asuntu Sosiál, Maximiano Neno, reprezenta delegasaun hosi Timor-Leste espesiál RAEOA, agradese ba grupu feto sentru DESKRANASDA TTU nian, tanba iha hanoin di’ak atu hala’o vizita ofisiál iha grupu inavativu sira iha Oé-Cusse.
“Objetivu hosi ami-nia vizita ne’e hanesan atividade kontinuasaun tanba antes ne’e Governu Timor-Leste ho Indonézia selebra ona akordu ho intensaun atu hametin relasaun lasu amizade,” nia katak.
Responsável másimu ekipa delegasaun ne’e, fundamenta, objetivu seluk hosi vizita ne’e realiza mós estudu komparativu, atu haree prosesu dezenvolvimentu ne’ebé konsege hala’o ona iha TTU no Timur Tenggah Selatan (TTS), nune’e mós saida mak RAEOA halo ona no bele estuda hamutuk hodi kompleta ba malu.
Notísia relevante: Delegasaun RAEOA vizita sentru produsaun manu-tolun no veterinária karau iha TTU
Jornalista : Abílio Elo Nini
Editór : Evaristo Soares Martins
