DILI, 15 Agostu 2025 (TATOLI)–Diretór Adminsitrasaun Finanasa Lojistika no Aprovizionamentu iha Hospitál Nasionál Guido Valadares (HNGV), Clementino da Costa, informa iha fulan Setembru ne’e Empreza Murak sei monta CCTV iha areadór HNGV.
Notísia Relevante: HNGV sei instala CCTV iha areadór ospitál
“CCTV daudaun ne’e iha ona prosesu prokuramen la’o hotu ona no depois hein de’it ona. Empreza Murak ne’ebé mak sai vensedór ba iha atividade ida-ne’e mak sei halo hela kompras. Ami fó tan tempu iha fulan-Setembru, empreza ne’e iha posibilidade hatama sasán mai atu ita monta ba iha areadór HNGV tomak,” Clementino da Costa dehan ba jornalista sira, iha nia kna’ar fatin HNGV, ohin.
Nia dehan, konsellu diretivu HNGV garante katak fulan-Setembru mai ne’e, CCTV bele mai ona tanba iha parte empreza iha kompromisu katak fulan oin ne’e sasán ne’e to’o ona no iha posibilidade sei bele monta.
“Empreza ne’ebé mak manán projetu ne’e naran Murak. Orsamentu ne’ebé mak prevee ba CCTV ne’e hamutuk rihun $20 maibé empreza mai ho nia proposta katak sasán ne’e iha fali rihun $16,” nia dehan.
Nia dehan, CCTV ne’ebé mak empreza kompras ne’e hamutuk 20 hodi monta iha areadór HNGV ne’ebé mak identifika ona hanesan farmasia, ida iha kotuk ne’eba hodi asegura ekipamentu médiku sira iha lojistika no emerjénsia, nune’e bele kontrola servisu pesoál saúde nian no mós bele kontrola movimentu vizitante sira mai HNGV, inklui areadór fatin estasionamentu atu nune’e bele kontrola motorizada sira-ne’ebé mak para iha ne’e.
Jornalista : Felicidade Ximenes
Editór : Cancio Ximenes
