DILI, 27 maiu 2023 (TATOLI)—Komisaun Nasionál Eleisaun (CNE), sábadu ne’e, hala’o serimónia enseramentu apuramentu nasionál katak CNE konklui ona halo verifikasaun ba votu reklamadu hamutuk 515 no konsege válida votu 351, hodi atribui votu 191 ba Partidu Conselho Nacional Reconstrução Timorense (CNRT).
Notísia Relevante: CNE simu keixa tolu durante apuramentu nasionál
“CNE, sábadu (27 maiu 2023) ne’e, konklui ona prosesu apuramentu nasionál hosi sentru votasaun 1.472 inklui diaspora, nune’e CNE halo desizaun ba vota reklamadu 515 nune’e verifika no halo desizaun perante fiskál partidu polítiku sira-ne’e, nune’e atribui votu 351 ba CNRT,” Komisária CNE, Odete Maria Belo, hateten iha konferénsia imprensa, iha salaun mídia CNE Colmera, Dili.
Nune’e, hosi votu válidu 351 ne’e, CNE deside sai válidu ne’ebé destribui ba partidu CNRT hamutuk 191, partidu FRETILIN hamutuk 96, Partidu Demokrátiku hamutuk 26, Partidu Libertasaun Popular hamutuk 13, Partidu KHUNTO hamutuk sia (9), PUDD hamutuk ualu (8), PVT hamutuk neen (6), Partidu UNDERTIM ida (1) no CASDT ida (1).
Hosi votu reklamadu 515 ne’e, nia hateten, votu ne’ebé kontinua sai nulu ka inválidu hamutuk 158, votu rezeitadu hamutuk ida (1), votu branku hamutuk lima (5) no votu ne’ebé sai válidu hamutuk 351.
Prosesu apuramentu nasionál ne’e hahú iha loron 24 fulan-maiu 2023 no enseramentu ne’e hala’o iha sábadu (27 maiu, ne’ebé parrisipa hosi fiskál partidu polítika sira, Polísia Nasionál Timor-Leste (PNTL), Sektretariadu Tékniku Administrasaun Eleitorál (STAE), dirijente Sekretariadu Jeral CNE ho nia funsionáriu sira no hetan kobertura hosi midia nasionál sira.
Jornalista : Osória Marques
Editór : Cancio Ximenes
