DILI, 28 setembru 2023 (TATOLI) – Ministériu Edukasaun (ME) serbisu hamutuk ho Parceria ba Dezenvolvimentu Umanu (PHD, iha inglés) no Organizasaun Naun-Governamentál Belun hodi disponibiliza formasaun ba enumeradór na’in-60 husi kada munisípiu atu halo levantamentu dadus ba profesór sira iha territóriu.
Ministra Edukasaun, Dulce de Jesus, hatete formasaun ne’e atu fasilita enumeradór sira ne’ebé mai husi eskola bázika atu halo levantamentu dadus no oinsá atu prienxe formuláriu hodi hetan informasaun kona-ba profesór iha eskola ida-idak.
“Formasaun ba enumaradór na’in-60 ho intensaun atu fasilita serbisu Ministériu Edukasaun nian hodi orienta profesór sira bele rekolla dadus no identifika loloos manorin iha eskola ida-idak no halo mós análiza dadus iha ministériu atu hatene ho loloos profesór sira ne’ebé hanorin iha eskola ne’e tuir duni nia área ka la’e”, Dulce de Jesus esplika iha JL Vila Fatuhada, ohin.
Levantamentu dadus ne’e atubele hatene mós eskola ne’ebé maka profesór barak liu no eskola ne’ebé mak sei falta dosente, nune’e bele koloka manorin sira.
Diretór Belun, Luís Ximenes, afirma katak Belun hetan konfiansa husi Ministériu Edukasaun no PHD atu fó formasaun kona-ba verifikasaun no análize dadus.
“Ita apoia formasaun bázika de’it depois ita-nian peritu sira husi PHD hamutuk ho parseiru sira seluk maka sei halo formasaun kle’an liu kona-ba metódolojia, oinsá atu rekolla dadus. Papél Belun nian maka atu haree ba prosesu rekrutamentu enumeradór sira ho balansu bazeia ba igualdade jéneru no oinsá bele kapasita sira”, katak.
Formasaun ba enumeradór sira realiza, entre loron 28 no 29, no iha outubru sira bele bá ona terenu hodi hala’o sira-nian atividade rekolla dadus no foka mós ba estatutu manorin sira.
Iha Timor-Leste, manorin barak hanorin iha rejime voluntariadu dezde 2013 no larejistu iha sistema. Ministériu Edukasaun rejista profesór efetivu hamutuk 10.523 no kontratadu 5.203.
Jornalista: Tomé Amado
Editora: Maria Auxiliadora
