DILI, 27 agostu 2025 (TATOLI)—Eskritór, Sérgio Paulino Dias Quintas, Kuarta ne’e, lansa livru ho títulu ‘Ha’u mate tanba ukun rasik-an’, ne’ebé nia dedika no reflete ba Liurai Veríssimo Dias Quintas.
Eskritór deskreve, istória ne’e atu aniversa fali nia aman liurai, Veríssimo Dias Quintas, nia luta to’o mate.
“Komemorasaun ne’e reflete omisídiu ne’ebé akontese iha loron 27 Agostu 1999″, Sérgio Paulino hateten iha Timor Plaza.
Nia haktuir, hakerek livru ne’e atu dada jerasaun foun sira-nia atensaun tenke hatoman-an hodi hakerek istória Timor.
“Tanba ita-nia istória la’ós atu ema seluk hakerek, maibé ita-nia istória ne’e hakerek kona-ba luta ba ukun rasik-an hodi inspira joven sira atu hakerek no hatene istória,” nia akresenta.
Notísia relevante : MJDAK planeia prodús livru istória kona-ba Baukau
Nia dehan, tuir planu livru ne’e sei rai hela iha Muzeu Rezisténsia iha Dili no iha Saudozu Veríssimo nia rezidénsia iha Fuiluro.
Eskritór prodús livru ne’e ho lian tolu no produsaun dahuluk ba kopia 250, kompostu husi Malaiu 100, Inglés 100, no Portugés 50, ho objetivu atu fó ema hotu bele asesu no permite ema hotu atu aprende kona-ba istória Timór.
Iha fatin hanesan, Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitáriu, hateten, hakerek istória hanesan faktu ida.
“Tanba ita-nia tinan ne’e hahú ho ferik-katuas sira. Tanba ne’e, ita presiza hakerek istória ho versaun oinoin, maibé ita sei kompleta malu tanba sei iha veteranu barak atu fó sasin ba malu, no ita-nia luta iha klandestina,” Vise Primeiru-Ministru, katak.
Jornalista : Osória Marques
Editora : Julia Chatarina
