OÉ-CUSSE, 17 janeiru 2024 (TATOLI) – Estoke ai-moruk iha armazeinamentu Hospital Referénsia Rejiaun Administrativa Espesiál Oé-Cusse Ambeno (RAEOA), sufisiente hodi fó atendimentu ba komunidade sira iha Oé-Cusse Ambeno.
Notísia relevante: Profisonál saúde 91 iha Oé-Cusse serbisu voluntária, 44 termina kontratu
Diretór Apoia Servisu Klínika iha Hospitál Referénsia, Celestino Pui, informa, iha mandatu Prezidente Autoridade dahuluk, Mari Alkatiri, RAEOA selebra kontratu ho Servisu Autónomu Medikamentu no Ekipamentu (SAMES) mak fornese ai-moruk ba fasilidade Oé-Cusse.
Maibé daudaun ne’e muda ona ba Institutu Nasionál Farmasia no Produtu Médiku (INFPM) maka fornese.
“Estoke kona-bá aimoruk, ita iha Oé-Cusse sufisiente hela ba atendimentu loron-loron,” Celestino Pui, ba jornalista sira iha Oé-Cusse, kuarta ne’e.
Tuir nia, durante problema ai-moruk akontese iha territóriu nasionál inklui Hospitál Nasionál Guidu Valadares (HNGV) maibé iha Oé-Cusse item balu sufisiente hela no laiha problema.
Diretór Klínika ne’e, rejeita atu esplika detalla kona-bá aimoruk kada item sira menus no sufisiénte, tanba nia parte sei koordena ho parte tékniku sira, atu prepara pedidu hodi hato’o ba armazein INFPM.
“Ha’u labele esplika detallu, item hotu-hotu iha stoke-out, maibé ami-nia obrigatóriu ne’e, ami nafatin prepara pedidu atu hato’o ba armazeinamentu INFPM hodi hetan fornesimentu tán, ita-nian ai-moruk laiha problema,” nia katak.
Tuir nia, iha loron tersa semana ne’e, Ministra Saúde ho ekipa, hala’o ona vizita ofisiál ba iha armazeimentu INFPM, no konsege hetan ona resposta, katak ai-moruk agora daudaun iha ona prosesu nia laran.
“Ne’ebé semana ne’e nia laran, ha’u sei koordena tékniku sira atubele halo pedidu ba armazeinamentu INFPM,” nia promete.
Entretantu, kona-bá atendimentu pasiente, iha hospitál referál Oé-Cusse laiha problema kona-bá ai-moruk tantu laboratóriu, ekipamentu no medikamentu sira.
Notísia relevante: Komisaun F halo fiskalizasaun urjente ba INFPM haree problema aimoruk “stock out”
Jornalista: Abílio Elo Nini
Editór: Evaristo Soares Martins
