VIQUEQUE, 16 jullu 2024 (TATOLI)- Administradór Postu Lacluta, Viqueque, Pascol Gama Martins, preokupa kondisaun estrada aat iha suku Ahic no suku Laline liga ba postu administrativu, nune’e difikulta ba komunidade sira transporta produtu lokál asesu bá merkadu.
Komunidade iha suku rua ne’e enfrenta problema estrada tanba iha diresaun ne’e mota hamutuk lima, ne’ebé ponte sira mós laiha kondisaun, nune’e tempu udan komunidade sira obrigada tenke deskansa iha uma tanba labele halo movimentu.
“Tanba husi mota lima bo’ot, maibé laiha ponte ida hodi fasilita ita-nia komunidade, hanesan tempu bain-loron komunidade sira la’o di’ak no komunidade sira lori sira-nia produtu lokál bá asesu merkadu. Maibé, iha tempu udan boot ita-nia komunidade sira labele lori mós sira-nia protudu ba faan iha merkadu. Ho situasaun sira-ne’e ita sente triste”, Administradér Pascol Gama Martins, hateten ba Agência Tatoli, iha postu Lacluta, ohin.
Estrada liga ba suku rua ne’e maioria rai komunidade no tenke ultrapasa mota hanesan We Aas, We Leu, We Dora, Derok Oan no mota Kao no mota hirak ne’e ponte laiha.
Nune’e, komunidade sira tenke haku’ur mota no risku ba sira-nia vida. Distánsia husi postu Lacluta Vila bá suku Ahic no Laline purvolta kilómetru 17.
“Ho kondisaun estrada sira-ne’e ha’u husu ba Governu sentrál hodi tau atensaun hodi hadi’a estrada sira-ne’e, atu komunidade sira bele asesu no lori sira-nia produtu lokál ba merkadu, atu komunidade sira bele hadi’a sira-nia ekonomia família uma-laran”, nia sujere.
Tuir dadús populasaun suku Laline iha aldeia lima kompostu husi Aimeti-Hun,Fatu-Kedo, Mau-Ama, Mikradek no Santo Antonio, ho total populasaun 943 (tuir sensus 2015).
Enkuantu dadús populasaun suku Ahic kompostu husi aldeia lima hanesan Crarec Boco ho totál uma-kain 42, Hali-oan ho totál uma-kain 36, Ailooc iha uma-kain 57, Hali-mean iha 97, Cai-ua iha 72, nune’e totál uma-kain iha suku hamutuk 304 no totál populasaun 2.004.
Antes ne’e, Prezidente Autoridade Munisípiu Viqueque, Francisco Cruz Simões de Gonzaga Soares, haktuir preokpasaun ba kondisaun estrada sira-ne’e liuliu ba postu Lacluta liga ba suku rurál autoridade munisípiu Viqueque tau ona iha planu perioridade no programa United Nations Development Programme (UNDP, sigla englés) ho apoia fundu hamutuk $628,872.37 hodi implementa projetu reabilitasaun estrada rurál iha suku Ahic ho distánsia kilómetru 10 ne’ebé dadauk ne’e sei iha faze tenderizasaun nomós reabilita sistema bee-moos postu Ossu.
Notisia relevante:PAM Francisco Cruz hakarak promove partisipasaun povu hodi dezenvolve Viqueque
Jornalista : Vitorino Lopes da Costa
Editór : Florencio Miranda Ximenes
