VIKEKE, 24 Juñu 2026 (TATOLI)—Estudante sekundáriu husi eskola Kardinia International School husi nasaun Austrália hamutuk ho profesór sira vizita Sentru Formasaun Komunitáriu Fundasaun Knua Haberan Komunidade (F-KHK), iha Suku Uma-Ki’ik, Postu Vikeke Vila, Munisípiu Vikeke.
Objetivu husi vizita ne’e atu kria lasu amigavel ho estudante sira iha Vikeke ne’ebé aprende kona-ba lian inglés no komputádór iha sentru komunitáriu iha F-KHK.
Diretór Ezekutivu F-KHK, Augusto Pinto haktuir, kona-ba vizita estudante sira husi nasaun Austrália ne’e kada tinan sira sempre mai vizita sentru komunitáriu ida-ne’e atu hametin lasu amigavel entre Timor-Leste no Austrália.
“Tan ne’e, ami hato’o agradese ba estudante sira husi Austrália no profesór tanba bele mai vizita ona ami-nia sentru ida-ne’e. Ami sente vizita ida-ne’e sai hanesan oportunidade di’ak ba ami no ba Munisípiu Vikeke. Maski ami-nia kondisaun ladún di’ak, maibé sira iha vontade ne’ebé di’ak hodi mai haree ami-nia fasilidade sira no estudante sira,” Augusto Pinto ba TATOLI iha edifísiu F-KHK, Kuarta ne’e.
Nia hatutan vizita ne’e estudante sira husi Austrália no profesór sira konversa ho estudante sira husi sentru komunitária ne’ebé F-KHK estabelese nune’e sai oportunidade ba estudante sira bele pratika ko’alia lian inglés ho estudante Austrália sira.
“Ami espera katak ba futuru estudante sira husi nasaun Austrália kontinua mai vizita ita-nia Munisípiu Vikeke, atu estudante sira bele aprende hamutuk entre estudante Austrália no estudanre Timor-Leste liuliu ba Munisípiu Vikeke,” nia tenik.
Iha vizita ne’e, Reprezentante Profesór husi Kardinia International School husi Austrália, Kath, hato’o obrigadu ba F-KHK ne’ebé simu ona estudante sira husi Kardinia Internasiotionl school iha sentru komunitáriu ho di’ak.
“Iha tinan kotuk ami mai uluk hodi hasoru malu ho responsavel sira no estudante sira iha sentru komunitáriu ida-ne’e no agora ita kontinua hasoru malu nafatin. Ami espera vizita ida-ne’e ita bele kontente hamutuk husi ohin bá-oin,” nia tenik.
Iha fatin hanesan, reprezentante estudante husi Kardinia International School, Olivet, sente kontente tebes ho vizita ida-ne’e tanba estudante sira husi sentru komunitáriu ida-ne’e simu estudante sira husi Kardinia Internasiotionl school ho kmaus tebes no oferese prezente ba estudante sira.
“Ami sente kontente tebes tanba estudante sira simu ami ho laran tebes. Ida-ne’e ami sente kontente liu hakarak halimar ho estudante iha Vikeke. Ami mós hato’o agradese ba inan-aman sira tanba oferese ona prezente ba ami. Espera bá-oin ita hamutuk nafatin,” nia informa.
Tuir observasaun jornalista TATOLI katak iha vizita estudante sira husi Kardinia International College Austrália to’o iha Sentru Komunitáriu F-KHK, estudante no inan-aman sira simu ho haksolok no estudante hamutuk ho inan aman sira oferese tais no prezente sira seluk ba profesór eskola Kardinia International College Austrália hamutuk na’in-tolu (3) no estudante na’in-sanulu hodi hametin lasu amigavel entre estudante no inan-aman sira.
Tuir dadus, estudante husi Sentru Komunitáriu iha F-KHK hamutuk na’in-80 no formadór hamutuk na’in-tolu kompostu husi formadór inglés báziku no formadór komputadór no formasaun ne’e F-KHK oferese gratuita ba estudante sira iha Munisípiu Vikeke.
Hafoin remata simu estudante Australiana sira, bainaka hirak-ne’e kontinua vizita ba sala sentru komunitáriu no estudante sira husi sentru komunitáriu konversa direta ho estudante Austrália hodi hametin relasaun amizade.
Entremtantu, iha vizita ne’e hetan partisipa husi autoridade lokál, inan-aman sira husi Suku Uma-Ki’ik no funsionáriu sira iha F-KHK. Vizita ne’e durante loron lima, iha Munisípiu Vikeke hodi hakbesik liubá estudante sira aprende hamutuk.
Jornalista: Vitorino Lopes da Costa
Editór: Xisto Freitas da Piedade
