VIKEKE, 15 Outubru 2025 (TATOLI)—Diretór Ensinu Sekundáriu Tékniku Vokasionál (ESTV) Ravina, Postu Administrativu Lakluta, Munisípiu Vikeke, Rosito Soares Morais husu Ministéru Edukasaun konstrui morru protensaun ba edifísiu ESTV atu proteje ambiente eskola.
“Problema ne’ebé agora daudaun ami enfrenta iha eskola mak morru protesaun tanba ami laiha morru, nune’e balada sira livre tama sai iha resintu eskola nian. Tan ne’e, ami hakarak husu ba Ministériu Edukasaun hodi konstrui morru hodi proteje balada sira labele tama iha resintu eskola no labele estraga ambiente,” Rosito Soares Morais hateten ba TATOLI iha Postu Lakluta, Kuarta ne’e.
Rosito haktuir profesór ESTV Ravina mós implementa atividade ortikultura iha-ne’ebé oriente estudante sira pratika kuda modo iha eskola, maibé balada sira sempre tama hodi estraga modo sira-ne’ebé estudante sira kuda.
Nia dehan, problema morru protesaun ne’e foin lalais profesór ESTV aprezenta ona ba Prezidente Autoridade Munisípiu (PAM) Vikeke atu solusiona.
Tuir dadus, estudante Ravina Lakluta husi Departamentu Produsaun ho totál estudante hahú primeiro ano to’o terceiro ano hamutuk na’in- 97 no atuál profesór ne’ebé hanorin ativu hamutuk na’in-snulu (10).
Jornalista: Vitorino Lopez da Costa
Editór: Xisto Freitas da Piedade
