DILI, 17 jullu 2023 (TATOLI) – Estudante departamentu haat – Komérsiu no Turizmu, Jestaun, Kontabilidade no Siénsia Ekonomia husi Fakuldade Ekonomia, Universidade Nasionál Timor Lorosa’e (UNTL) hetan difikuldade iha estájiu ne’ebé realiza iha munisípiu, tanba falta transporte atu apoia sira-nian atividade.
Estudante Fakuldade Ekonomia João Paulo de Jesus sujere ba UNTL atu disponibiliza tan transporte ba kada fakuldade sira, nune’e bele fasilita di’ak liután atividade estájiu, tanba durante ne’e alunu sira enfrenta hela problema transporte, nune’e hamosu impedimentu estájiu ba sira.
“Ami hanesan estudante Ekonomia sujere ba universidade atubele apoia tan karreta lima ba kada fakuldade, nune’e bele responde atividade saida de’it maka fakuldade sira halo kada tinan”, João Paulo dehan ba Tatoli iha kampus rezende.
Nia salienta fakuldade sia iha universidade daudaun uza veíkulu sira ne’ebé mak disponivel iha UNTL no tanba de’it transporte ne’ebé universidade prepara limitadu maka hamosu impedimentu ba atividade estájiu ba fakuldade sira.
Vice-Dekanu I Fakuldade Ekonomia, Rosena Martins, admite katak transporte sai problema boot ida ne’ebé universidade sempre hasoru kada loron, maibé nia rekoñese UNTL nu’udar instituisaun boot sempre buka solusaun oinsá atu responde atividade estudante sira-nian.
“Ami mós hanoin ona atu halo pedidu ruma ba universidade atu apoia tan transporte ruma mai ami-nian fakuldade, nune’e labele prejudika atividade sira no kada tinan labele ona hasoru problema sira hanesan ne’e”, afirma.
Tuir nia, iha tinan ne’e Fakuldade Ekonomia iha estudante hamutuk 475 maka sei bá estájiu iha munisípiu tolu mak hanesan Bobonaro, Lautém no Aileu, maibé tanba falta transporte mak fakuldade deside transporta uluk estudante 100 bá Bobonaro depois maka deside tan atividade estájiu iha munisipiu rua seluk.
Atividade estájiu ne’ebé maka estudante sira sei halo iha kada munisípiu sira ne’e atu bá solusiona problema saida maka komunidade sira enfrenta, nune’e hamutuk ho komunidade sira hala’o atividade sosiál hodi tulun sira iha atividade saida de’it tuir siénsia ne’ebé maka sira hetan ona iha universidade.
Jornalista: Tomé Amado
Editora: Maria Auxiliadora
