ERMERA, 05 marsu 2022 (TATOLI) – Kandidatu Xefe Estadu, Felisberto de Araújo, kompromete ba populasaun Ermera atu koordena ho Governu hodi estabelese presu minímu ba kafé bainhira eleitu, tanba produtu ne’e poténsia ba esportasaun.
Kandidatu ne’e lembra katak tinan 20 ona seidauk iha presu minimu ba kafé no prejudika agrikultór sira.
“Tanba sira-nian kafé folin tun liu. Esportadór sira fa’an iha rai-li’ur hodi hetan lukru ne’ebe boot loos. Karik eleitu ba Prezidente Repúblika, sei ko’alia ho Governu atu halo lei hodi estabelese presu minímu ba káfe Ermera”, nia afirma bainhira hala’o kampaña dor to dor, iha merkadu Gleno, Ermera.
Tuir Felisberto, kada tinan agrikultór sira kuda no produz kafé hodi fa’an, “maibé ita haree ema sira ne’e ki’ak nafatin tanba laiha presu mínimu ba produtu ne’e”.
Nia relata katak rai barak iha estranjeiru define presu kafé ho objetivu mak regulariza merkadu ba produtu ne’e, liuliu ba nasaun sira ne’ebé adota merkadu livre.
“Folin mínimu ba kafé bele ho dólar 5 ka 6 atu ajuda fali ema ne’ebé mak kuda. Se la’e, tinan-tinan populasaun Ermera kontinua ki’ak”.
Nia salienta katak sai Xefe Estadu la signifika hala’o fali serbisu Governu nian, maibé koopera.
“Presiza mós Prezidente Repúblika ida ne’ebé matenek, profisionál atubele haree programa ne’ebe mak di’ak hodi serbisu hamutuk ho Ezekutivu, nune’e bele responde preokupasaun sira”, realsa.
Tanba ne’e, bainhira sai Xefe Estadu sei foti desizaun ida ne’ebe adekuada hodi fó benefísiu ba povu no rai ida ne’e. “Se la’e, kuandu lei laiha, iha empreza balun inventa folin kafé tuir sira-nian hakarak”, tenik nia.
Ikus liu, sei kria kuota ka hapara importasaun ba produtu sira ne’ebé mak povu Timor Leste produz ona. Ezemplu, hapara ka hamenus importasaun manu tanba timoroan haki’ak ona, maibé ayam potong kontinua tama.
Jornalista: Domingos Piedade Freitas
Editora: Maria Auxiliadora
