BOBONARO, 30 juñu 2023 (TATOLI) – Xefe suku Guda, postu administrativu Lolotoe, munisípiu Bobonaro, Francisco Caetano, hateten governu dasia presiza kontinua implementa programa Uma Naroman ba Povu (UNP) no Programa Mão de Obra Postu Administrativu (PMOPA).
Notísia relevante: Taur disponível apoia governasaun lideradu hosi Xanana Gusmão
“Ami hanesan autoridade lokál, ne’ebé di’ak hosi VIII Governu ne’e bele kontinua, liuliu hanesan UNP no PMOPA ne’e, tanba programa ne’e benifísia direita ba povu no hadi’ak idak-idak nia ekonomia família” nia informa ba Tatoli, sesta ne’e.
Tuir nia, governu tuan mós tenke disponivel apoia governu foun tanba programa sira ne’ebé trasa maioria konsentra ba dezenvolvimentu nasionál liuliu atu hadi’ak povu nia moris.
“Espera katak governu ne’ebé forma hosi partidu CRNT no PD ne’e sei la halo diskriminasaun iha ukun,” Francisco Caetano katak.
Xefe suku Ritabou, postu administrativu Maliana, Maximiano dos Santos Araujo, husu ba Governu foun tenke kumpre promesa ne’ebé hato’o ba povu iha kampaña eleitorál fulan rua liubá.
Tuir nia, votu ne’ebé povu depozita iha eleisaun 21 maiu liubá, bazea ba programa ne’ebé polítiku sira hato’o iha kampaña eleitorál,atubele hadi’ak sira nia moris, liuliu lori dezenvolvimentu mai to’o baze.
Tanba ne’e lideransa komunitária ne’e rekomenda katak governu dasia presiza foka liuliu ba infraestrutura bázika hanesan bee-moos, eletrisidade no estrada tanba to’o agora povu balu seidauk sente dezenvolvimentu.
Alende ne’e presiza tau atensaun mós investe iha setór produtivu sira nune’e bele estimula ekonomia rai laran hodi povu labele depende ba produtu importasaun hosi rai-li’ur.
“Ida ne’e mak presiza tau iha prátika,atu eleisaun tinan lima mai ne’e povu nafatin tau fiar ba iha governu ida ne’e, tanba povu presiza moris di’ak,” nia katak.
Enkuantu tuir ajenda aban loron 01 fulan julhu tinan 2023, Prezidente da Repúblika, José Ramos Horta, sei fó pose ba membru Governu foun mai hosi Partidu Congresso Nasional Reconstrução Timorense (CNRT) no Partidu Demokrátiku (PD).
Notísia relevante: Dosente UNTL husu Governu Dasiak tenke investe iha kooperativa
Jornalista: Sergio da Cruz
Editór: Evaristo Soares Martins
