OÉ-CUSSE, 24 agostu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, kria polítika ‘Programa Suku Amasat’ atu promove partisipasaun komunidade iha prosesu dezenvolvimentu, nomoos atu redús kazu má-nutrisaun no liña pobreza iha rejiaun enklave ne’e.
Adjuntu Prezidente Autoridade RAEOA, Maximiano Neno atuál Sekretáriu Rejionál ba Asuntu Sosiál, informa, bazea dadus hosi organizasaun internasionál hatudu katak kazu boot rua ne’ebé povu Oé-Cusse enfrenta mak má-nutrisaun no liña pobreza ho pursentu aas iha Timor-Leste.
“Polítika Autoridade ne’ebé lidera hosi, Prezidente Autoridade, hakarak implementa Programa Suku Amasat ne’e atu responde buat rua, primeiru atu redús kazu má-nutrisaun segundu maka redús liña pobreza kiak nian iha ita-nia rejiaun rasik,” Maximiano Neno, ko’alia iha ámbitu lansamentu Programa Suku Amasat iha suku Ban-Afi, sub-rejiaun Nítibe, tersa ne’e.
Nia informa, bazea dadus pezkija hosi United Nations International Children Fund (UNICEF), hatudu katak iha munisípiu 13 iha Timor-Leste, Oé-Cusse okupa segundu lugár ba kazu má-nutrisaun iha Timor-Leste, nomoos dadús estudu pezkija hosi United Nations Development Programme (UNDP), dadus kona-bá lina kiak iha Timor-Leste, Oé-Cusse mak okupa primeiru lugár.
Tan ne’e, Programa Suku Amasat kria atu responde ba ba kazu rua ne’e, tanba ne’e, husu entidade hotu iha suku atu koopera malu, nune’e povu tenke envolve no senti katak, programa ne’e komunidade nian, la’os autoridade nian no grupu ida nian.
Nune’e komunidade tenke iha kolaborasaun di’ak serbisu maka’as, tanba programa ne’e iha ninia indikadór sira, atu hetan klasifikasaun primeiru to’o terseiru lugár iha nia kritéria, tan ne’e tenke serbisu maka’as atu prienxe rekizitu, hodi hetan avaliasaun di’ak nune’e bele sai manán-na’in ba Programa Suku Amasat.
“Tinan ne’e ita koko ba suku 10, tinan seluk sei kobre hotu suku 18, ita sei kontinau avalia, tanba programa ne’e nia sub-programa ne’e iha setór hotu, saúde, edukasaun, solidariedade sosiál, agrikultura, ambientál, maibé iha futuru ita bele aumenta tan ne’ebé relevante ho kondisaun povu nian, ”
iha lansamentu ne’e, xefe suku Lela-Ufe hosi sub-rejiaun Nítibe, José Neno Sila, agradese ba autoridade RAEOA ba programa ne’e tanba foin primeira-ves realiza iha Oé-Cusse
“Tenke hatudu ezemplu di’ak hanesan programa Suku Amasat, polítika ida-ne’e foin primeira-vez realiza iha Timor-Leste, ha’u hanoin ida-ne’e hanesan motivasaun ba komunidade oinsa bele dezenvolve rasik suku, no iha futuru sei la ejize beibeik ona ba Governu, tanba agora hetan ona apoiu fundu, entaun tenke serbisu maka’as atu hadi’a suku, no nia benefísiu fila-fali ba komunidade,” nia dehan.
Durasaun ba implementasaun Programa Suku Amasat ne’e, implementa ho durasaun kada tinan ida, ba primeiru lugár sei hetan prémiu rihun $15, segundu lugár hetan prémiu rihun $10 no terseiru lugár hetan rihun $7.
Notísia relevante: RAEOA lansa ‘Programa Suku Amasat’ promove komunidade dezenvolve suku.
Jornalista: Abílio Elo Nini
Editór: Evaristo Soares Martins
