DILI, 14 Agostu 2025 (TATOLI)—Governu Timor-Leste liuhusi Ministru Administrasaun Estatál, Tomás do Rosário Cabral hamutuk ho reprezentante delegasaun Uniaun Europeia iha Timor-Leste, Christoph Sorg, no Adjuntu Sekretária Jerál Uniaun Sidade Kapitál Lian Portugés (UCCLA, sigla portugés), Embaixadora Paula Leal da Silva, Kinta ne’e, inaugura Jardín Kafé Farol, ne’ebé lokaliza iha suku Motael, postu administrativu Vera Krús, munisípiu Dili.
Jardín Farol harii iha ámbitu Projetu Parseria hodi Haforsa Governasaun Urbana, Inkluzaun Sosiál no Promosaun Empreendedorizmu iha Dili, Timor-Leste, ho orientasaun husi Ministériu Administrasaun Estatál (MAE) / Autoridade Munisípiu Dili (AMD), ne’ebé koordena husi UCCLA iha parseria ho Konsellu Sidade Lisboa (CML), ho finansiamentu husi Uniaun Europeia no ko-finansiamentu husi Governu Timor-Leste.
Iha ámbitu ne’e, Ministru Administrasaun Estatál, lori IX Governu nia naran hato’o agradesimentu ba prezensa husi konvidadu sira hotu.
“Governu atuál bainhira kumpre ninia kompromisu eleitorál, nia kontinua konsidera Parseria hanesan esforsu ida atu konkretiza Governu nia boa vontade hodi serbí ba hadi’a kondisaun moris populasaun nian iha sidade laran,” Ministru hato’o iha ámbitu serimónia inaugurasaun jardín.
Notísia relevante : Ai-funan kuda iha jardin Faról-Timor Lodge balun namlaek ona
Governante ne’e konsidera, reforsu governasaun urbana hanesan faktu ida-ne’ebé hatudu kompromisu Governu nian atu hala’o dezenvolvimentu hanesan harii infraestrutura ne’ebé bele kondisiona ambiente sidade ne’ebé Moos, Organizadu no Saudável (MOS).
Aleinde ne’e, inisiativa ne’e nu’udar artikulasaun husi atividade entre Governu Timor-Leste ho parseiru dezenvolvimentu. Eventu ne’e hatudu pasu ida tan ba oin hodi hala’o parseria ne’ebé estabelese ona liuhusi ezekusaun programa.
Ministru espresa agradesimentu ba disponibilidade Uniaun Europeia nian ne’ebé presta ona korrespondénsia ba hakman todan orsamental ne’ebé hatur iha Governu nia kabás, hodi promove finansiamentu hamutuk ho IX Governu Konstitusionál ba realiza obra ida-ne’e.
Iha biban ne’e, Ministru rekoñese esforsu hosi UCCLA, ne’ebé sai hanesan inisiativa di’ak ida atu promove kooperasaun entre Cidades Amigas. Hanesan símbolu amizade no fraternidade ne’ebé hamahon-an iha Lusofonia
“Maka loraik ida-ne’e ita bele asiste progresu ruma iha konkretiza programa urbanizasaun ne’ebé la’o dadauk ona,” Governante ne’e reforsa.
Ministru hato’o sujestaun, iha espasu jardín ne’ebé luan ne’e karik bele harii mós vedasaun ida hodi bele asegura ninia sustentabilidade no garante ambiente MOS.
“Bele mos kompleta ho infraestrutura ba estasionamentu veíkulu sira nian no hafurak liután ho palku ki’ik ida-ne’ebé destina ba serimónia konvíviu nian liuhusi aprezentasaun muzikál, konsertu ka interpretasaun senas iha fatin ida-ne’e,” Tomás Cabral, katak.
Ministru apela ba membru komunidade Lusofonia nian atu nafatin mantein espíritu kooperativu hodi bele hatudu ba mundu, “katak ita mós bele kria amizade no solidariedade iha mundu rai klaran no kompromete-an atu harí bem-estar ba ita-nia povu iha kualker rejiaun ne’ebé pertense ba família Lusofonia nian,”
Inisiativa ne’e reflete kompromisu Governu nian hodi haburas turizmu lokál, enkoraja empreendedorizmu, no hametin kooperasaun bilaterál entre Munisípiu Dili no sidade kapitál sira seluk ne’ebé ko’alia lian portugés iha rede luzófona nia laran.
Ministru Tomás Cabral, informa, jardín ne’e sei entrega ba AMD ho razaun atu nune’e munisípiu Dili bele jere no halo arrendamentu.
Jardín Farol maka parte ida husi inisiativa kooperasaun ida-ne’ebé luan liu entre Timor-Leste no UCCLA ne’ebé dezeña atu hadi’a sidade nia ambiente públiku no fornese ba komunidade ho espasu ida-ne’ebé akollidu ba atividade sira tempu livre no sosiál nian.
Dezeñu jardín ho nia vista furak ba tasi-ibun Farol nian, sei oferese ambiente atmosfera trankuilidade ne’ebé asesivel no atrativu ba rezidente no vizitante sira.
Fasilidade sira iha Jardín Farol nia laran sei inklui kafé ida iha ne’ebé públiku bele goza kafé Timor nian no ai-han lokál sira seluk, nomós hahán sabor portugueza sira ne’ebé selesionadu.
Fatin ne’e hein atu sai hanesan pontu fokál ba interrasaun komunidade nian, fatin ba ezersísiu, interkámbiu kulturál no oportunidade sira negósiu ki’ik nian.
Serimónia ne’e marka prezensa husi Prezidente Tribunál Rekursu, Autoridade Militár no Polisiál, membru Governu, Komisáriu Komisaun Antí-Korrupsaun, Xefe Gabinete, Diretór Jerál no Nasionál MAE no husi liña ministeriál, Autoridade Munisipál Dili, konvidadu no funsionáriu sira.
TATOLI
