DILI, 08 Agostu 2025 (TATOLI) – Prezidente Repúblika (PR), José Ramos-Horta, husu ba kafekultór sira iha Timór laran tomak atu kuidadu kafé no kontinua hasa’e nia produsaun.
Xefe Estadu ne’e dehan Timor-Leste rasik iha kafé, maibé nafatin halo importasaun ba produtu ne’e.
“Ita tenke buka atu aumenta produsaun tanba ita-nia kafé iha valór, maibé nia produsaun seidauk sufisiente. Ha’u sempre halo promosaun kafé ba iha mundu no ha’u pesoál lori kafé tama to’o Bazílika Saun Pedro Roma, tanba atu hatudu katak ita-nia kafé iha valór”, Ramos-Horta hateten iha Fomentu, ohin.
Tanba ne’e, Timor-Leste presiza hasa’e produsaun kafé orgániku, liu arábika tanba folin tebes. “Hato’o ba joven sira labele oho laku, tanba kafé laku-teen folin tebes. Iha Hongkong kilo ida $500. Entaun, oinsá mak Timor bele manán osan ne’e kada kilo ida. Se Governu ho matenek buka kontrola kadeia komérsiu nian, hahú husi kafé hun to’o iha merkadu nasionál no internasionál”, nia dehan.
Ba ida-ne’e bele tanba relasiona ho Fundu Petrolíferu ne’ebé tun, Governu iha hanoin uza fundu ne’e hodi kria instituisaun ida halo kontrrolu marketing iha esplorasaun no distribuisaun kafé nian.
“Bainhira instituisaun ne’e iha Timor-Leste, bele halo kontaktu ho konsumidór sira iha rai-liur halo negósiu kafé nian no osan bele tama”, salienta.
Jornalista: Arminda Fonseca
Editora: Maria Auxiliadora
