DILI, 28 maiu 2024 (TATOLI) – Ekipa Kampung Alor FC susesu hadau tan pontu tolu husi adversáriu Bita-Ba FC liu husi golu úniku, iha jogu kontinuasaun faze grupu kopa Maun Boot Kay Rala Xanana Gusmão ne’ebé realiza iha Estádiu Munisipál Dili, tersa lokoraik ne’e.
Hanesan baibain jogu komesa jogadór ekipa rua lansa kedan kontra no atake ba mau tuir tékniku no abilidade ekipa idaidak nian nune’e hadau malu se los atu hatama uluk golu.
Kampung Alor komesa hatudu kedan nia jogu bonitu hodi aperta Bita-Ba nia jogu, nune’e Kampung Alor tenke domina jogu. Avansadu Kampung Alor tenta lansa sutu barak maibé sutu hirak ne’e seidauk kona iha alvu.
Maske hetan presaun maka’as Bita-Ba mós lakoi lakon, hatudu jogu ne’ebé brillante maibé sempre falla iha finalidade tanba defeza Kampung Alor la fó fatin.
Ho forsa ne’ebé Kampung Alor iha hatudu duni rezultadu, iha minutu 16 jogadór Nazario de Oliveira konsege fura ona rede Bita-Ba muda kedan rezultadu ba 1-0. Golu ne’e hanesan presaun boot ba Bita-Ba tenke servisu maka’as nune’e bele halo empata jogu ne’e.
Maske servisu maka’as Bita-Ba labele halo buat ida to’o jogu primeira parte termina, nune’e Kampung Alor mós la prodús tan golu hodi aumenta rezultadu.
Hakat ba segunda parte, Bita-Ba halo mudansa jogu iha lina klaran no oin nune’e bele hatama golu maibé mudansa ne’e hela de’it hanesan mudansa tanba la prodús golu ruma.
Kampung Alor nafatin lansa atake ne’ebé maka’as maibé sempre falla iha lina oin, sutu barak ne’ebé avansadu halo sempre salva husi guarda rede no barak mós defeza Bita-Ba salva.
Tanba forsa ne’ebé hanesan ekipa rua nunka prodús golu to’o jogu termina no vitoria hela ba Kampung Alor no Baita-Ba hela ho derrota.
Husu pontu ne’ebé Kampung Alor rekolla hamutuk hitu nune’e nia mak lidera provijoriu grupu B, pozisaun segundu Bita-Ba ho pontu haat, terseiru Mulia FC ho pontu ida no ikus liu Surya Lafaek FC ho pontu ida.
Jogu ne’e lidera husi árbitru prinsipál Fernando da Costa, juiz liña Antonio Carvalho, Donatos Portela no árbitru rejerva Francisco Pereira.
Notísia relevante: Manán 2-1, Relay FC kompleta jogu ho vitória
Jornalista: Hortencio Sanchez
Editór: Florencio Miranda Ximenes
