BAUCAU, 24 jullu 2024 (TATOLI) – Korpu Bombeiru munisípiu Baucau preokupa karreta utilizada ba atendimentu inséndiu avaria no seidauk halo manutensaun.
Komandante Korpu Bombeiru Baucau, Vitorino Duarte Ribeiro, esplika, viatura rua ne’e hanesan tanki bee no xupadór ida ne’ebé kondisaun estragu no sai preokupasaun tanba Bombeiru Baucau labele atende komunidade hanesan situasaun emerjénsia bainhira mosu inséndiu.
“Iha situasaun ne’e, kuandu akontese inséndiu ruma ita labele responde, tanba kondisaun karreta mak hanesan nee,” Komandante Korpu Bombeiru munisípiu Baucau hateten iha Vila Antiga, kuarta ne’e.
Kareta tanki tula bee ba kombate inséndiu hetan avaria iha parte travaun no disko embraiajen, nune’e to’o agora paradu no la halo movimentu kuaze fulan ona.
Alende ne’e, karreta xupadór PSL antes ne’e apoia husi Governu Japaun hetan avaria fulan-rua ba kotuk tanba estragus iha ekipamentu mangeira.
“PSL ne’e lao bainhira karreta tanki funsiona, mas ida mesak de’it labele, kuandu inséndiu ruma akontese karreta rua sempre la’o hamutuk ba hala’o serbisu,” Vitorino Ribeiro akresenta.
Komandante Vitorino, argumenta, tinan barak tanki tula bee laiha manutensaun to’o hetan avaria, enkauntu ekipamentu mangeira xupadór ba viatura PSL presiza importa hosi fábrika própriu iha Japaun.
Korpu Bombeiru Baucau, hato’o ona situasaun hirak-ne’e ba nasionál ho esperansa iha tempu besik bele iha solusaun nune’e bele ajuda serbisu iha baze, liuliu kona-ba kazu akontesimentu inséndiu.
Korpu Bombeiru Munisípiu Baucau rejista funsionáriu hamutuk na’in-23 kompostu husi Komandante no Segundu Komandante, Xefe Seksaun na’in-tolu no membru na’in-18.
Jornalista : Natalino Belo
Editór : Evaristo Soares Martins
