DILI, 28 Outubru 2024—Profesór admitidu hamutuk 698 ne’ebé hetan valór 68-66 iha teste vaga bolsa kandidatu, hein prosesu despaisu ministeriál.
“Prosesu profesór admitidu sira-ne’ebé entrega ona dokumentu ne’e, ami hein despaisu no diploma ministerial mak ami bele públika sai naran. Loloos ohin maibé iha asuntu balun, entaun seidauk bele halo xamada ba ita-nia kandidatu profesór sira-ne’e. Tanba ne’e, hein despaisu ministeriál. Ami trata hela despaisu ministerial ida-ne’e, ita presiza komisaun nia despaisu ba kandidatu 698,” Diretora Rekursu Umanu iha Ministériu Edukasaun (ME), Anita Tavares, informa ba Agência Tatoli, iha resintu ME, Vila-Verde, segunda ne’e.
Notísia relevante : Ministériu Edukasaun sei rezolve problema manorin sira ho bolsa kandidatu iha 2024
Númeru ne’e inklui mós ho profesór kandidatu ba pre-eskolár hamutuk 31 iha faze dahuluk nian. Tanba ne’e mak agora ME lori karta ne’e ba Komisaun Funsaun Públika hodi hein desizaun hafoin bele atualiza iha Jornal da República.
Kandidatu sira-ne’e kompleta tiha ona no hein xamada depois fó pose tiha mak foin koloka sira ba eskola sira iha munisípiu ne’ebé presiza profesór.
Submisaun dokumentu komprovativu bolsa kandidatu faze daruak husi númeru seriasaun 686 to’o 1182, ba grupu rekrutamentu siklu 1 no 2 Ensinu Báziku.
Bazeia ba despaixu omologasaun husi Ministra Edukasaun, ho númeru 044/GMME/VIII/2024, loron 23 agostu 2024, ne’ebé aprova seriasaun bolsa kandidatu ba grupu rekrutamentu siklu 1 no 2 Ensinu Báziku ho kandidatu hamutuk 2.441.
Nune’e, Diresaun Nasionál Rekursu Umanu apela ba kandidatu sira husi númeru seriasaun 685 to’o 1182 husi pontuasaun 66 to’o 68 atu komprova no kompleta dokumentu rekezitu sira molok hakat ba etapa sira tuir mai.
Jornalista : Osória Marques
Editora : Julia Chatarina
