KOVALIMA, 22 Fevereiru 2025 (TATOLI) – Segundu Komandante Jerál Polísia Nasionál Timor-Leste, Komisáriu Pedro Belo, alerta ba membru polísia sira iha munisípiu Kovalima atu uza arma ho kuidadu.
“Utilizasaun arma tenke ho didi’ak. Ita-nia lei hateten bainhira hala’o serbisu mak uza arma no serbisu hotu entrega ba iha seksaun armóriu tanba kontrola bainhira PNTL uza kilat hodi hala’o serbisu. Hafoin serbisu mak balun la entrega, seksaun armóriu hato’o relatóriu ba komandante munisipiu [hodi] bolu no fó atensaun. Bainhira la rona aplika prosesu disiplinár, nune’e labele uza sala”, Komisáriu Pedro Belo hato’o bainhira vizita Komandu PNTL Kovalima, sábadu ne’e.
Dirijente PNTL ne’e salienta katak lori kilat bá uma no rai la ho kuidadu ne’e problema, tanba esperiénsia hatudu katak labarik sira bele lori hodi tiru ema seluk, tanba ne’e presiza uza arma ho kuidadu.
“Uza munisaun no arma legál ne’ebé Estadu fo ba ita. Hafoin uza entrega kedas, se la entrega bainhira hetan kazu ruma kumpri mandu buska husi Tribunál. Bainhira identifika ida-ne’e hamosu tan kazu foun”, nia salienta
Tanba ne’e, kona-ba rai munisaun no arma tuir Lei Nú. 5/2017 kona-ba Rejime jurídiku ba prátika arte marsiál, rituál, arma branka no rama ambon.
Lambra katak, iha loron 19 Fevereiru ne’e, Diresaun Investigasaun Kriminál Nasionál ezekuta mandadu husi Tribunál Distritál Primeira Instánsia Suai hodi halo buska domisiliáriu ba rezidénsia inisiál FDS ne’ebé identifika rai kilat musan no magazen lima.
FDS hanesan membru ativa PNTL nu’udar Ajente xefe ne’ebé husu lisensa la ho vensimentu dezde 2015.
Notísia relevante: PNTL halo buska domisiliáriu patrimóniu FDS iha nia rezidénsia Kovalima
Jornalista: Celestina Teles
Editora: Maria Auxiliadora
