DILI, 24 juñu 2024 (TATOLI) – Komisáriu foun ba Komisaun Anti-Korrupsaun (CAC, sigla portugés) Rui Peireira dos Santos, komprometidu atu lidera CAC ho profisionál.
“Ha’u rona iha preokupasaun barak hosi públiku, tanba ha’u-nia kandidatu ne’e dehan ha’u husi partidu bo’ot CNRT, tanba ne’e balun konkorda no balun diskorda ho ida ho ha’u-nia kandidatura ida-ne’e. Sim ida-ne’e, opiniaun ema idaidak nian, ita respeita, tanba ema hothotu iha direitu hato’o sira-nia opiniaun. Maibé ha’u atu dehan katak bainhira ha’u simu pose hanesan Komisáriu CAC ha’u sei halo ha’u nia kna’ar ida-ne’e ho profisionál durante mandatu hanesan Komisáriu CAC”, Rui Peireira hateten ba TATOLI via telefone, segunda ne’e.
Nia haktuir, hanesan Eis-Juiz no ema ne’ebé hola parte mós iha komisaun ba rekrutamentu Juiz sira no halo kna’ar Advogadu inklui ema ne’ebé mós uluk asume kargu hanesan Adjuntu Komisáriu CAC brani asume reponsablidade ne’ebé IX Governu Konstitusionál no Parlamentu Nasionál depozita, tanba iha ona esperiénsia ba área sira ne’e iha tempu ne’ebé naruk.
“Sim, ha’u prontu atu halo saida de’it, sé mak sala dehan sala, sé maka los dehan los, ne’e tanba nunka tauk, ha’u mós ema ne’ebé iha esperiénsia iha setór justisa iha tempu naruk”, nia adianta.
Rui subliña katak seidauk bele koalia detallu kona-ba programa no prioridade sira durante mandutu maibé hanesan Komisáriu ba CAC foun sei konsolida fila fali funsionamentu CAC ne’ebé tinan ida resin paradu no ida seluk mak atu finaliza dezeñu prototipu ba edifísiu CAC ne’e molok antigu Komisáriu Sergio Hornai lakonsege finaliza tanba kestaun mandatu.
“Ha’u atu hateten katak planu ida ne’ebé mak uluk Dr Sergio lakonsege konklui mak dezeñu ba edifísiu foun CAC ne’ebé mak tama ona faze terseiru maibé la konklui, ha’u ba hodi kontinua obra ida-ne’e tanba uluk Parlamentu Nasionál preve osan milluan $7 atu harii konstrusaun foun ba edifísiu CAC no rai ita liberta ona mak iha kampu besik sede UDT rai ne’e Governu atribui ona ba futuru instálasaun edifísiu CAC”, nia dehan.
Nia esplika, atu sai membru ASEAN, Timor-Leste mós tenke iha CAC ne’ebé labele lakon ho komisaun anti-korrupasaun nasaun membru ASEAN sira-nian hanesan KPK Indonézia no hosi Malázia nian, Singapura inklui Thalándia nian. Tanba restante sira membru ASEAN nian CAC Timor-Leste ne’e di’ak liu.
Rui promete sei halo kna’ar ho di’ak no kuidadu hodi tane aas kredibilidade CAC sai institusaun ba prevensaun ba atu korrupasaun sira.
“Ha’u hanoin nudar Komisáriu CAC eleitu, ita tenke trata servisu sira ho kuidadu, ita labele simu titipan hosi polítiku, sé politiku sira dehan maibé prova laiha ita labele halo buat ida, ita labele tán dei’t ema temi ida-ne’e ita tenke ba ida-ne’e, dala ida tán halo akuzasaun ba ema ne’e tenke iha prova, labele dún matak ema, tanba CAC tenke mós respeita ba prezunsaun de inocencio”, nia dehan.
Komisáriu CAC eleitu rekorda katak iha kazu balun ne’ebé uluk ema kestiona CAC kona-ba kazu antigu Ministru Asuntu Parlamentár no Komunikasaun Sosiál (MAPKOMS) Francisco Jerónimo. Iha kazu ida-ne’e CAC halo fallansu.
“Nudar Komisáriu ita tenke trata sasan sira ne’e ho kuidadu tuir regra, ita kuandu ba buska ema nia fatin buat katak no tertankap tangan ne’e buat ketak no buska ne’e ita só ba rekolla de’it dokumentu ita labele ema hotu ita lulun dala ida ba ne’e lalaos, tanba ne’e sasan sira hanesan ne’e ita tenke ho kuidadu”, nia dehan.
Nia agradese ba konfiansa ne’ebé IX Governu Kontitusionál fó hodi lidera instituisaun hanesan CAC.
“Ha’u agradese ba konfiansa ne’ebé IX Governu fó mai ha’u dala ida tán atu dehan katak ida ne’e konfiansa no ha’u sei hatudu servisu ho profisionál”, nia konklui.
Rui Pereira eleitu sai Komisáriu CAC liuhosi eleisaun Parlamentár ho votu 41, kontra haat no abstensaun zero.
Jornalista: Natalino Costa
Editór : Zezito Silva
