DILI, 25 Juñu 2025 (TATOLI)-Deputadu husi Komisaun B iha Parlamentu Nasionál (PN), ne’ebé trata Asuntu Negósiu Estranjeiru, Defeza ho Seguransa, Natalino dos Santos, bolu atensaun Polísia Nasionál Timor-Leste (PNTL) atu halo investigasaun kle’an ba grupu ne’ebé hola parte iha atividade foti subar telemovel iha Dili.
“Husu ba PNTL, liuhusi PNSIK halo investigasaun kle’an atu haree karik ne’e grupu organizadu”, deputadu ne’e hato’o.
Nia preokupa tanba atividade ne’e envolve mós menoridade, ne’ebé antes ne’e akontese ona no agora kontinua. “Ne’e krime oganizadu, balun sira tenta atu envolve menoridade. Sira hatene lei proteje labarik sira bainhira halo krime nia laiha responsabilidade”, akresenta.
Deputadu ne’e solisita, liuliu ba autór judisiáriu iha tribunál oinsá fó medida ruma ka bele fó punisaun ba sira, bainhira to’o ona idade hodi kumpre, nune’e hapara ona atividade ne’e.
“Ida-ne’e loroloron akontese, labarik envolve iha krime sira ne’e. Ita haree krime organizadu, presiza investigasaun kle’an hodi bele kombate”, nia reitera.
Natalino dos Santos salienta katak lejizlasaun iha lakuna, nune’e ema balun tenta hala’o objetivu ida-ne’e hodi uza labarik sira bá na’ok ema seluk nia sasán.
Deputadu ne’e husu mós ba Governu atu kria sentru juveníl, nune’e labarik sira ne’ebé envolve atu krime bele reintegra iha ne’ebá hodi reabilita sira-nia mentalidade no atetude hafoin fila bá komunidade.
Vise Ministru ba asuntu Parlamentár, Adérito Hugo da Costa, mós bolu atensaun komandu mezmu ka’er autór balun la’ós halo identifikasaun de’it, maibé presiza investigasaun karik relasiona ho rede krime organizadu ruma hodi hatene nia motivu loloos.
Relembra katak PNTL Eskuadra Dom Aleixo halo identifikasaun ba suspeitu na’in-ualu ne’ebé hola parte iha atividade foti subar telefone.
Suspeitu na’in-ualu ne’e iha tersa (17/6) sira halo operasaun kordenada hodi bá foti subar ema nia telemovel ha Dili laran.
Notísia relevante: PNTL halo identifikasaun ema na’in-ualu ne’ebé envolve grupu foti subar telefone
Jornalista: Nelson de Sousa
Editora: Maria Auxiliadora
