DILI, 19 Maiu 2026 (TATOLI)–Prezidente Tribunál Rekursu, Afonso Carmona, informa, Komisaun Rekrutamentu Juíz ba Supremu Tribunál Justisa (STJ) hahú serbisu iha edifísiu provizóriu Supremu Tribunál.
“Agora nia prosesu edifísiu provizóriu Supremu Tribunál Justisa ne’e ita bele dehan pursentu 95. Hein 21 Maiu agora Prezidente Repúblika atu mai vizita iha ne’e atu haree. Agora Komisaun Rekrutamentu hala’o serbisu iha ne’e, sira-nia fatin iha leten (andar leten). Sira komesa halo serbisu iha ne’e,” Afonso Carmona hateten ba Jornalista sira iha edifísiu provizóriu, Kolmera, Tersa ne’e.
Notísia relevante : Komisaun Rekrutamentu ba Juíz STJ husu KSMJ Portugal disponibiliza juri
Nia dehan, edifísiu ne’e sei la halo inaugurasaun tanba uza de’it edifísiu Tribunál Dili tuan hodi instala STJ.
“Ita orsida fahe de’it Tribunál Rekursu mai fali Supremu Tribunál Justisa, tanba laiha inaugurasaun ita só poder ba Juíz sira ne’ebé atu tuur iha Supremu Tribunál mak sei halo iha ne’e,” nia akresenta.
Daudaun Komisaun Rekrutamentu ba Juíz Supremu Tribunál halo hela serbisu hodi halo rekrutamentu Juíz sira, tanba ne’e Komisaun ne’ebé lidera husi Komisáriu Avelino Coelho esforsu hodi iha tinan ne’e hodi bele halo rekrutamentu ba Juíz sira ne’ebé mak sei halo knaar Supremu Tribunál Justisa.
Jornalista : Natalino Costa
Editora : Julia Chatarina
