COVALIMA , 05 Outubru 2022 (TATOLI) – Administradór Munisípiu Covalima, Francisco de Andrade informa, Kompañia Timor Holding sei halo reabilitasaun ba Edifisiu Gedung Wanita iha munisípiu Covalima, bazeia ba pedidu autorizaun hosi Ministériu Justisa.
“Kompañia Timor Holding reabita edifisiu Gedung Wanita ida-ne’e , atu loke jogo kasino. Tanba, sira -nia lisensa mai hosi Ministériu Justisa mak fo autorizasaun. Maibé molok autoriza ita tetu ona katak fó benefísiu ba estadu barak liu tanba ne’e mak ita foti desizaun ida ne’e,” Francisco de Andrade hateten ba jornalista sira, iha Santa-Rosa, Covalima, kuarta ne’e.
Nia isplika, Kompañia Timor Holding reabilita edifisiu Gedung Wanita bazeia ba autorizasun no edifisiu ne’e abandona durante tinan 20-resin ona no la tau matan husi ema ruma.
Administradór ne’e mos dehan, kompañia sei finaliza reabilitasaun edifisiu ne’e sei loke Kasino ne’ebé fo kampu servisu ba Covalima-oan besik 30 no sei selu taxa ba estadu 10%.
“Ita-haree vantajen bo’ot liu ba iha munisípiu, entaun ita foti desizaun hodi reabilita edifisiu Gedung Wanita. Maske públiku la satisfeitu maibe bainhira autoridade tetu di’ak ba Covalima oan sira balun bele ona servisu iha fatin Kasino,” nia dehan.
Gedung Wanita nu’udar edifisiu eransa husi tempu Indonézia nian ne’ebe husik hela iha Covalima, depois tiha restorasaun independensia tinan 2002.
Gedung Wanita sai fatin Kasino hamihis feto nia dignidade
Entretantu, Eis Prezidente feto potensiál Covalima, Amelia de Jesus Amarál, konsidera transforma “Gedung Wanita” sai hanesan fatin atu loke Kasino, ida-ne’e hamihis feto sira-nia dignidade.
“Ha’u preokupa bainhira “Gedung Wanita” sai fatin atu loke jogu Kasino ne’e, primeiru ita hamihis ona feto nia dignidade tanba “Gedung wanita” fatin ne’ebè besik eskola pré-eskolár servisu Edukasaun Covalima, rezidénsia Administradór no komandu PNTL” nia dehan.
Tanba “Gedung Wanita” ne’e transforma sai fali fatin loke jogu Kasino hatudu imajen no nasaun Timor-Leste espesiál munisípiu Covalima ne’e oinsá, tanba prepara rai naruk ba jerasaun foun sira-nia futuru.
“Ita tau fatin jogo Kasino, imajen Covalima ho nasaun Tumor-Leste ne’e oinsá.ita prepara rai naruk, oinsá ho ita-nia jerasaun foun tanba nasaun la’ós ita mak kaer nafatin. Se ita prepara fundasi lá di’ak hosi prepara benefisiu ba ita-nia an di’ak lalika sai líder no sai inan. Ha’u hanoin Klot lá hanoin futuru maibé hanoin de’it oinsá atu benefisiu ba ita-nia an,” nia dehan.
Amelia mós husu ba autorida atu deside desizaun ruma karik tenke konsulta malu hodi fó ideia ba malu, tanba nasaun Timor-Leste adota direitu demokratiku la’ós nasaun otoritáriu.
Gedung Wanita iha tinan 2014, eis administradór Munisípiu Agustino Mendonça bainhira reabilita “Gedung Wanita”, feto sira mak sei jere no hodi tau restaurante.iha tinan 2018 eis administradór Afonso Nugueira Nahak entrega nafatin ba feto sira.
Razaun saida mak agora foti uma ne’e sai buat seluk ida. Ita nu’udar inan sai preokupasun boot estudante sira-ne’e imajen ne’ebé ladi’ak no sira sei sai lidér ne’ebe la di’ak sira hanoin hakarak jogu ne’ebé la fó benefisiu.
Antes ne’e iha loron 05 fulan-outubru tinan 2022, administradór munisípiu Covalima Francisco de Andrade hateten, Kompañia Timor Holding reabilita Gedung Wanita iha munisípiu Covalima bazea hetan pedidu autorizaun hosi Ministériu Justisa (MJ).
“Objetivu kompañia Timor Holding reabita Gedung Wanita ida-ne’e, atu loke jogu Kasino, tanba sira -nia lisensa mai hosi Ministériu Justisa (MJ) entaun ita autoriza. Maibé molok autoriza ita tetu ona katak fó benefísiu ba Estadu barak liu, tanba ne’e mak ita foti desizaun,” Francisco de Andrade informa.
Jornalista : Celestina Teles
Editóra : Armandina Moniz
