DILI, 25 juñu 2024 (TATOLI) – Vise Primeiru Ministru no Ministru Koordenadór asuntu Ekonómiku no Ministru Turizmu Ambiente, Francisco Kalbuadi Lay, dehan komunidade timoroan sira ne’ebé hela iha rai liur kompromete atu apoiu Governu hodi promove Turizmu Timor-Leste nian ba mundu.
“Ohin, ita hasoru ita-nia maluk sira ne’ebé mak mak uluk 1974 -1975, sira sai hosi timor ba rai liur, balun iha portugal, Macau, Singapura, maibé ikus sira halibur malu iha Austrália no sira ohin mai hamutuk ema 27 mai vizita Timor, entaun sira haree timor katak buat barak iha mudansa di’ak tebes no sira iha esperansa katak atu promove Turizmu Timor-Leste nian ba mundu”, Ministru Kalbuadi, informa ba jornalista sira salaun MKAE Farol, ohin.
Ministru haktuir, timoraon sira-ne’e haksolok bainhira sira haree dezenvolvimentu ne’ebé la’o daudaun ona.
“Sira haksolok bele fila hikas mai ita-nia rain no sira orgullu ba dezenvolvimentu ne’ebé mak ita iha hafoin ita ukun aan no sira iha esperansa katak aban bainrua, oan no bei oan sira bele kontribui di’ak liután ba Timor-Leste nia dezenvolvimentu ba futuru.
Iha fatin hanesan, Vise Prezidente Asosiasaun Ying Fo iha diaspora Tam Oi Mi, sente orgullu bainhira hasoru malu ho Vise Primeiru Ministru no Ministru Koordenadór Asuntu Ekonómiku no Ministru Turizmu Ambeinte hanesan amigu di’ak no kolega eskola iha tempu uluk.
“Ami sente orgullu, maske ami hela iha Austrália, maibé ami sempre hanoin kona Timor-Leste, tanba ami moris iha ne’e, entaun ami iha hanoin ida atu promove turizmu Timor nian ba mundu, nune’e bele kontribui ba dezenvolvimentu rai ne’e nian. Ho ami-nia vizita ida-ne’e ami kompremetidu atu promove Turizmu Timor-Leste ba mundu liu husi ami-nia servisu no relasaun di’ak”, Tam Oi Mi hateten.
Nia esplika, timoroan sira-ne’e sei estadia durante loron 10 no sei vizita sítiu turístiku sira ne’ebé Timor-Leste iha no sei halo promosaun ba mundu hodi atrai turista sira mai.
Jornalista : Felicidade Ximenes
Editór : Zezito Silva
