BAUCAU, 12 juñu 2023 (TATOLI) – Progresu konstrusaun jardín eroi Daramutu, postu administrativu Laga, munísipiu Baucau iha faze finalizasaun.
Sekretáriu Jerál Konsellu Munisipál Kombatente Libertasaun Nasionál (CMCLN, sigla portugés), Manuel ‘Alari’ da Costa Soares, esplika, projetu refere atinje ona pursentu 80 ne’ebé faze finalizasaun foka ba kanál bee, Jardín ai+funan no konstrui uma ba restu mortal inklui hakerek naran ba rate saudozu sira.
“Faze finalizasaun maibé remata loloos dalaruma fulan-jullu tinan-2024,” Sekretáriu Jerál CMCLN Baucau informa ba Agência TATOLI iha Vila Antiga, segunda ne’e.
Konsellu veteranu Baucau laiha informasaun kona-ba prosesu konkursu públiku no orsamentu ba projetu refere maibé sempre akompaña ministériu hodi halo monitorizasaun, maske laiha responsablidade ba projetu refere.
Maske nune’e, liuhosi livru orsamentu munisipál, Ministériu Asuntu Kombatentes Libertasaun Nasionál tinan-2023 aloka orsamentu hamutuk rihun $ 150 hodi kuda duut iha jardín eroi Daramutu, suku Soba, postu admistrativu Laga, munisípiu Baucau.
Jardín eroi Darumutu, Laga rasik atuál tótal restu mortal ne’ebé haloot ona hamutuk 509 no hela 130 mak seidauk haloot, enkuantu mate foun hamutuk na’in-lima.
Jornalista : Natalino Belo
Editór : Evaristo Soares Martins
