DILI, 17 Jullu 2025 (TATOLI)—Jogu Association of Southeast Asian Nations (ASEAN-sigla ingleza) Championship Mandiri Cup tinan-2025 entre Timor-Leste ho Myanmar rezulta impata 4-4.
Ekipa rua fahe pontu ba malu hafoin elementu treinadór Simon Eliseetche husi Timor-Leste enxe golu tolu iha segunda volta bainhira Myanmar lidera uluk 1-2 iha primeira volta.
Jogu dahuluk entre Myanmar kontra Timor-Leste realiza iha Estádiu Patriot Candrabhaga, Indonézia, ne’ebé atrativu hodi hatudu jogu kontra-atake ba malu nune’e Timor-Leste konsege kansela vitória ekipa adversária iha segunda volta.
Iha lala’ok jogu, ekipa Myanmar lidera uluk bainhira jogadór Wanna enxe golu dahuluk iha minutu 13 no kontinua kedas golu segundu iha minutu 39 husi jogadór Thein. Enkuantu, Timor-Leste konsege hamihis golu bainhira jogadór Mota enxe golu iha minutu 45+2, nune’e rezultadu primeiru volta ramata ho skor 1-2.
Notísia relevante: Jogadór nasionál na’in-24 sei partisipa jogu ASEAN Championship Mandiri Cup
Hafoin minutu 15 tempu intervalu ramata, Timor-Leste hahú jogu segunda volta ho inisiativa ofensiva nune’e iha minutu 53 Luís Figo konsege enxe golu hodi rezulta tabela skor impata 2-2.
Mezmu nune’e, Myanmar la lakon inisiativa atake. Tan ne’e, liu de’it minutu 55 jogadór Aung halo mudansa skor sai 3-2 no Mav Oo aumenta tan golu iha minutu 62 hodi rezulta ekipa Myanmar lidera hikas 4-2.
Jogu dezezivu tebes. Ekipa Lafaek la lakon esperansa. Sira aumenta liután ritmu jogu no hatudu espíritu patriotizmu. La kle’ur de’it, jogadór Vabio Canovaro enxe golu hodi muda skor sai 4-3 iha minutu 75. Ekipa rua kontinua hatudu jogu kontra-atake ho tensaun aas liután.
Timor-Leste iha kruzamentu entre lakon no impata. Sorte monu ba sira. La lakon no la manán maibé impata. Bakhito hanesan salvadór. Iha minutu estra nian, 92+2, nia fura guarda rede adversáriu hodi rezulta skor sai impata 4-4.
Timor-Leste hetan point pozitivu. Iha tabela klasifikasaun, Timor-Leste iha pontu 1 hamutuk ho Myanmar, enkuantu Thailándia hein jogu kontra Myanmar.
Selesaun Nasionál Timor-Leste túr iha grupu C hamutuk ho Thailándia no Myanmar, iha-ne’ebé tuir kalendáriu sei hala’o jogu iha loron-15-31 Jullu 2025, iha estádiu prinsipál Gelora Bung Karno no Patriot Candrabhaga.
Jornalista: Natalino Belo
Editór: Xisto Freitas da Piedade
