BOBONARO,14 outubru 2023 (TATOLI) – Jogu sub-livre faze oitavu finál iha estádiu Malibaka Yamato Maliana, sabadu ne’e, Klube Madiran FC manán mihis Klube Sobo-Ai ho rezultadu 2:1 hodi hakat ba kuarta finál.
Iha mentu dahuluk, ekipa rua lansa kedas kontra atake ba malu, tuir tékniku no tátika ne’ebé haraik hosi treinadór ida-idak nian, ekipa rua mai ho jogu ofensivu hotu.
Jogu kontinua la’o, oportunidade monu uluk ba Sobo-Ai tanba iha menutu lima, Avansadu Abaty (13) susesu fura uluk rede adversáriu hodi muda rezultadu ba 1:0.
Ho rezultadu ne’e, halo ambiente jogu manas liután tanba adeptu hosi ekipa rua haklalak hodi fó apoiu jogadór sira, bola la’o ain ba ain, to’o menutu 10 ba leten Sobo-Ai kontinua halo presaun maibé liña kotuk Madiran ne’ebé lidera hosi kapitaun Pedro Vicenti ‘Papi’(22) metin hanesan Rotunda Maliana ne’ebé bo’ok la bá.
Ekipa rua kontinua hadau malu ho intensaun atu gaña vitória maibé Madiran FC halo presaun barak, ikus mai ameasa hirak ne’e la hela de’it ho ameasa tanba iha menutu 31 Jogadór Ronaldo Amaral ‘Bolo’ 17 konsege hafera manu-tolun hodi muda rezultádu ba 1-1, ho golu ne’e halo Madiran hasa’e tan tensaun jogu no avansadu Vladimiro Santos ‘Bladi’ 18 les tan golu ida hodi muda rezultadu ba 2-1, eskor refere mantein to’o primeira parte remata.
Dólar ba segunda parte, ekipa rua nafatin hatudu jogu brilante hodi halo kontra atake ba malu, iha menutu 47 ba leten Sobo-Ai lansa ameasa barak liu hosi Jogadór Bolter Clau 11 no Artus Soares ‘Also’ 10, maibé suta barak mak la kona alvu no balu guarda rede Madiran ‘Akali’ salva.
Ho ameasa hirak ne’e, la hamate vontade Madiran FC tanba iha menutu 50 ba leten konsege halo bola barullu iha oin maibé defeza Sobo-Ai la fó let ba Madiran atu hetan oportunidade, jogu kontinua la’o treinadór Sobo-Ai muda estratéjia dada sai hotu defeza no avansadu ho orientasaun atu sobu joga Madiran FC atu hatama golu.
Iha menutu ikus, Sobo-Ai Hasa’e tan sira nia ritmu jogu, hodi fó prensaun tutuir malu ba guarda rede Madiran FC, maibé la iha rezultadu to’o menutu 90, arbritu deside aumenta menutu 5, ho ida-ne’e halo ekipa Sobo-Ai FC badinas liután buka bola, jogu la’o to’o menutu 90, jogadór Sobo-Ai Ruben (21) konsege responde Jogu ida maibé golu refere árbritu la konsidera tanba ‘Offsite’ jogu refere mantein to’o menutu remeta, vitória ba Madiran FC hodi hakat ba faze kuarta finál no Sobo-Ai tenke simu konsekuénsia lakon hodi fulan suku Oeleu.
Ambiente jogu ne’e remata ho asaun protestu hosi ofisiál no adeptus Sobo-Ai tanba la satisfas ho desizaun Asistente Árbritu (1) Lucas Felis ne’ebé konsidera Golu hosi Ruben ’21’ ne’e inválidu, asaun ne’e halo estádiu Malibaka Yamato Maliana konsege manas oituan maibé membru Polísia Task-Force Komandu Munisípiu Bobonaro no membru Batalaun Ordem Públika (BOP) konsege neutraliza situasaun.
Ikus mai, meza halo esplikasaun no parte Klube Sobo-Ai mós simu rezultadu ne’e, ho sujestaun ba Asosiasaun Futeból Bobonaro mak atu hadiak kualidade arbritrajen liuliu asistente árbritu sira.
Jornalista: Sergio da Cruz
Editór: Zezito Silva
