DILI, 12 abril 2023 (TATOLI)— Ministru Obra Públika (MOP), Abel Pires, hateten estrada sira ne’ebé hetan estragu hosi dezastre naturál iha munisípiu Ermera, daudaun iha ona konkursu públiku no iha tempu badak kompañia sei halo manutensaun estrada hosi Gleno to’o Letefoho.
“Horiseik kompañia halo vizita lokál (site visit), nu’udar parte ida hosi konkursu públiku nian ne’ebé no iha tempu badak kompañia manán na’in iha ona no sei halo manutensaun estrada sira hahú hosi Gleno to’o Letefoho,” Abel Pires dehan ba Tatoli iha Palásiu Governu Dili, kuarta ne’e.
Nia dehan, orsamentu ne’ebé Governu prevee ba manutensaun estrada sira ne’e, hamutuk besik milliaun $1.
Notisia relevante : Tempu badak MOP sei normaliza estrada kotu iha Eraulo-Atara munisípiu Ermera
“Ne’ebé ita hein konkursu públiku kompañia manán iha ona sei halo normalizasaun taka estrada kuak nune’e hodi fasilita ita-nia komunidade ba iha Eleisaun Parlamentár,” nia dehan.
Antes ne’e, iha loron (06/04) membru Governu ne’e mós halo ona observasaunba progresu normalizasaun ka rekoperasaun estrada no ponte ne’ebé kotu iha diresaun entre Gleno ba Ermera Vila komesa rezolve ona ba provizóriu nian.
Jornalista : Arminda Fonseca
Editora : Armandina Moniz
