DILI, 07 abril 2023 (TATOLI)— Ministériu Obra Públika (MOP), orienta ona kompañia Monte Veado Unipessoal, Lda hodi normaliza hikas estrada Eraulu postu administrativu Letefoho no Atara postu administrativu Atsabe, munisípiu Ermera ne’ebé kotu.
Ministru Obra Públika (MOP), Abel Pires, hateten relasiona ho estrada sira ne’ebé kotu iha munisípiu Ermera nian ba dala-rua ona hafoin udan boot akontese halo estrada sira kotu. Governu sei esforsu iha tempu badak kompañia bele halo normalizasaun fali ba estrada sira.
“Ohin ha’u mai halo observasaun oinsá buka dalan atu rezolve, tanba distánsia Eraulo no Atara ne’e dook oituan, hodi asesu ba mákina tronton ne’e difísil. Entaun sei han tempu oituan, parese loron ida no rua mak kompañia sei mai halo normalizasaun, tanba ita orienta tiha ona. Ha’u fiar katak la to’o fim de semana oin ne’e, normaliza ona,” Abel Pires hateten, liuhosi nota komunikadu ne’ebé Agência Tatoli, asesu, sesta ne’e.
Nia dehan, mobilizasaun ekipamentu pezadu ba halo normalizasaun iha fatin rua ne’e mak defísil tanba kondisaun estrada ne’ebé kotu tutuir dalan, liuliu iha suku Humboe nian defikulta tebes karreta pezadu tula eskapatór ba fatin rua ne’e.
“Maibé ita garante kompañia nasionál Monte Veado ne’ebé hetan fiar hosi Governu sei halo esforsu hodi mobiliza ekipamentu atu halo normalizasaun. Tanba hafoin estrada kotu iha Atara transporte públiku no privadu paradu ita hotu hatene estrada ne’e mak dalan úniku ba movimentasaun komunidade nian,” nia dehan.
Nune’e mós dalan Eraulu rasik, transporte públiku no privadu tenke liuhosi mota-laran, maibé bainhira udan-boot, mota tuun iha rísku boot no fó ameasa ba ema nia vida.
Entertantu diresaun estrada Gleno ba Ermera vila, daudauk ne’e kompañia nasionál ne’ebé iha kapasidade hala’o ona normalizasaun emerjénsia ba estrada no ponte hodi fasilita movimentu komunidade nian.
MOP orienta kompañia sira halo servisu normalizasaun iha terrenu liuhosi liuhosi Diresaun Jerál Estrada, Ponte, Prevensaun no Kontrollu Seia (DJEPPKS).
Jornalista : Arminda Fonseca
Editora : Armandina Moniz
