DILI, 08 dezembru 2023 (TATOLI) – Reprezentante Vátikanu iha Timor-Leste, Monseñor Marco Sprizzi, hateten Don Virgílio Kardeál do Carmo da Silva SDB, nu’udar bibi atan loloos iha nia vida pastoral tanba serbí sarani sira ho domin.
Don Marco Sprizzi ne’e hato’o apresiasaun ne’e bainhira iha selebrasaun misa ordenasaun tinan 25 ba Don Vírgilio Kardeál do Carmo da Silva iha Igreja Katedrál-Dili, sesta ne’e.
Notísia relevante: Don Virgílio do Carmo da Silva, Kardeál dahuluk Uma Kreda Timor-Leste
“Ha’u apresia tebes iha tinan hirak ne’e nia laran mak espíritu autentikamente pastorál ita nia karízmu Don Vírgilio Kardeál sai bibi atan loloos. Tanba dedika serbisu pastorál, nunka ho maneira brukrátika, maibé ho domin loloos. Saserdote ne’ebé kuida no koñese besik nia povu, vizita sein kole parókia, kapela no komunidade iha área remota no nasaun nian,” Reprezentante Santa Sé hatete iha misa solenidade tinan padrueira Arkiodiseze nian no tinan 25 saserdotál Don Vírgílio Kardeál nian.
Monseñor ne’e dehan hahú koñese iha tinan 2019, bainhira to’o iha Timor-Leste, nia bele hatene kualidade Bispu nia hanesan kordialidade no simptia umana, unida iha inteljénsia viva, konsentrasaun iha analiza ba situasaun no problema, espíritu konsturutivu no kapasidade diálogu.
Reprezentante Vátikanu ne’e mós sente onradu serbisu hamutuk ho Kardeál timoroan ne’e iha tinan hirak ne’e nia laran ho espíritu simplisidade no hakraik aan.
Tanba ne’e, Monseñor Marco Sprizzi kongratula tinan 25 aniversáriu saserdotál Don Virgílio Kardeál ho ezemplu fiar sarani nian no naroman karidade pastoral iha Timor-Leste.
“Ha’u hakarak anúnsia pesoalmente ba nomeasaun hotu no ha’u bele testemuña profunda umildade no espíritu ekleziál ne’ebé Don Vígílio Kardeál simu, ha’u konsidera hanesan rekoñesimentu outorgadu husi Santu Padre ba Igreja no ba povu Timor-Leste”, Menseñor Marco afirma.
Iha fatin hanesan, Bispu Dioseze Maliana, Don Norberto do Amarál, kongratula mós Don Virgílio Kardeál ba selebrasaun tinan 25 iha vida saserdotál.
“Selebrasaun ida ne’e memoria ba tinan 25 ne’ebé liu daudaun ona Don Vigílio Kardeál hala’o vida saserdotál nian, ho pasu neneik sai na’in-lulik no asume kargu barak iha nia kabas tanba konsistente. Parabéns no parabéns”, Bispu ne’e kongratula.
Don Virgílio Kardeál agradese sarani hotu
Don Virgílio do Carmo da Silva SDB afirma iha selebrasaun tinan 25 vida saserdotál ne’e sei kontinua fó esperansa nafatin ba uma kreda Timor-Leste.
“Uma kreda iha Timor buras nafatin no iha esperansa. Tinan 25 ne’e grasa Maromak nian. Maromak fó vida no kna’ar, hateke fila ba kotuk, buat barak akontese, maibé Maromak hili no fó kbi’it. Nune’e obrigada ba uma kreda, Salesianu no ema hotu ne’ebé tulun ha’u hala’o ha’u nia kna’ar saserdotál iha Timor-Leste”, agradese Don Virgílio Kardeál.
Arsebipsu ne’e mós la haluhan husu perdaun ba ema sira ne’ebé karik ho frakeza umana bele halo sala ruma: “Nu’udar ema iha ha’u nia aas no badak, entaun iha oportunidade ida ne’e ha’u husu deskulpa ho ha’u nia hahalok no liafuan”.
Biografia Don Virgílio Kardeál
Don Virgílio Kardeál moris iha loron 27 novembru 1967, iha Venilale, Timor-Leste, hala’o ninia estudu dahuluk iha eskola primária to’o sekundária iha eskola saleziana iha Fatumaca, hafoin nia kontinua ninia formasaun iha kongregasaun saleziana no halo ninia profisaun dahuluk iha loron 31 Maiu 1990 iha Komunidade Saleziana Fatumaca.
Halo ninia profisaun dahuluk, Mons. Virgílio hala’o ninia estudu filozófiku no teolójiku iha Manila, Filipina no durante ninia estudu iha Filipina, Mons. Virgílio halo ninia profisaun perpétua iha loron 19 marsu 1997.
Nia simu ordenasaun prezbiterál iha loron 18 dezembru 1998 iha Santuário Nacional de Maria Auxiliadora dos Cristãos Parañaque, Filipina, hafoin ramata ninia estudu teolójiku nian iha Don Bosco School of Theology (BDST) ne’ebé uluk hanaran Don Bosco Center of studies (DBCS).
Hosi tinan 1999 to’o 2002, nia tau-matan ba aspirante sira iha Fatumaca, hafoin muda ba Venilale hodi tau-matan ba pre-spirante sira-nia ho hala’o mós knaar nu’udar administradór komunidade nian.
Hosi 2005-2007, Mons. Virgílio continua filafali ninia estudu sira iha área espiritualidade nian iha Universidade Pontifícia Salesiana (UPS), Roma. Hafoin filafali mai Timór, hosi tinan 200 to’o 2014, Mons. Virgílio hala’o ninia knaar iha Komunidade Saleziana Fatumaca nu’udar Mestre dos Noviços.
Hosi tinan 2009-2014, Kardeál dezignadu hala’o mós ninia knaar nu’udar Diretór Komunidade Saleziana Fatumaca. Iha tinan 2015, Reitór-Mór Salezianu sira-nian Don Ángel Fernández Artime, SDB hili Mons. Virgílio sai Provinsiál ba Vise-Provínsia ITM (Indonesia-Timór) nian.
Iha loron 30 janeiru 2016, Mons. Virgílio hetan nomeasaun hosi Papa Francisco hodi sai Bispu Dioseze Dili nian no iha setembru 2019 foti nia sai Arsebispu dahuluk ba Arkedioseze Metropolitana Dili nian.
Hafoin, iha loron 29 maiu 2022, iha konkluzaun Regina Coeli nian, Papa Francisco fó sai naran hirak-ne’ebé atu hola parte iha Koléjiu Kardeál sira-nian hamutuk na’in-21 no entre sira ida mak Mons. Virgílio do Carmo da Silva, SDB.
Notísia relevante: Uma-kreda Timor-Leste agradese Papa Francisco hili Don Virgílio sai kardeál
Jornalista: Jesuína Xavier
Editór : Florencio Miranda Ximenes
